DILI, 31 marsu 2023 (TATOLI) – Diretór Nasionál Desportu hosi Sekretária Estadu Juventude no Desportu (SEJD) Cesarino da Silva, hateten, atleta sira ne’ebé iha hela preparativu atu ba kompete iha Sea Games hasoru duni difikuldade ba ai-han, hela fatin no roupa.
“Ita haree duni iha media, treinadór no atleta sira ne’ebé ita prepara ba SEA Games ne’e kestiona kona-ba hahan, hela-fatin no roupa ne’ebé mak oferese hosi kompaña, ita tuun ba iha kajerna Polísia Militár no observa katak ida ne’e los duni, entaun ita bolu kedan Konfederasaun Desportiva Timor-Leste hodi mai halo esklaresimentu kona-ba buat sira ne’e”, Diretór Cesarino da Silva, dehan ba Agência TATOLI iha edifísiu SEJD, ohin.
Tanba ne’e, SEJD husu ba CDTL atu responsabiliza ba fallansu hirak ne’ebé iha.
“Ida ne’e responsabilidade CDTL nian tanba orsamentu ita transfere hotu ona atu prepara atleta sira liuliu ba alimentasaun no ekipamentu treinamentu, atleta sira treinu presiza duni ai-han ne’ebé di’ak ba sira, ida ne’e mak ami bolu CDTL tenke rezolve lalais”, Cesarino dehan.
Nia haktuir, informasaun ne’ebé rekolla iha terenu dalabarak atleta atleta no treinadór kestiona kona-ba kualidade hahan no nia kuantidade. Ida ne’e kompeténsia CDTL nian atu fó atensaun ba kompaña maibé CDTL rasik la halo tanba porsi ai-han ba modalidade la hanesan. Iha mós informasaun katak atleta sira iha kajerna, loron ida asesu $18 ba hahan.
Modalidade hirak ne’ebé prepara atu ba kompete iha SEA Games tinan ne’e mak Atletizmu, Voleiból Praia, Taekwondo, Karate-do, Boxe, Futeból no Siklizmu.
Rekorda fali katak dezde tinan kotuk Governu liuhosi SEJD transfere ona osan hamutuk rihun $82 ba konta CDTL nian hodi fó ba modalidade hirak ne’ebé prepara ba SEA Games hodi halo preparasaun.
Jornalista: Hortencio Sanchez
Editór : Zezito Silva
