Baucau Vila sei implementa PMOPA iha abríl
BAUCAU, 03 abríl 2023 (TATOLI) – Administrasaun postu administrativu Baucau Vila, tuir planu sei hahú implementa Programa Mão de Obra Postu Administrativu (POMPA) iha fulan-abríl ne’e.
Administradór postu admistrativu Baucau Vila, Insencinio António da Silva, esplika, kada autoridade suku iha postu Baucau vila submete ona proposta atividade hodi hein desizaun liuhosi asembleia postu administrativu ne’ebé tuir planu sei realiza iha loron-10 fulan-abríl.
“Ita rekolla ona pedidu atividade ne’ebé sei hala’o iha kada suku no desizaun sei aprova data implementasaun hafoin páskua remata,” Administradór postu Baucau vila informa ba Agência TATOLI iha Vila Antiga, segunda ne’e.
Bazea ba matadalan autoridade suku sira deside atividade prioridade hanesan reparasaun estrada eskala kiik, konservasaun bee-matan, limpeza jerál no kuda ai-oan ne’ebé nia objetivu atu rekupera ekonomia komunidade iha área rurál liuhosi involvementu traballadór informál sira.
Ekipa postu sei direitamente ba fatin projetu hodi haree no koordena ho autoridade lokál hodi deside atividade ne’ebé prioridade hodi implementa iha PMOPA.
“Ita sei haree fali tanba iha faze rua entaun implementasaun fazeadamente tuir pedidu hosi autoridade suku,” Isencinio da Silva akresenta.
Postu Baucau Vila sei hetan alokasaun orsamentu hamutuk rihun $100 ne’ebé aloka ba kustu operasionál rihun $5 no kustu atividade rihun $95, ne’ebé fahe ba suku 11 ho atividade faze rua no sei envolve traballadór hamutuk 931.
Totál orsamentu PMOPA ne’ebé aloka ba munisípiu Baucau tinan-2023 hamutuk rihun $600, kada postu administrativu hetan alokasaun rihun $100, komposta hosi kustu operasionál pursentu 5 no kustu atividade pursentu 95 no sei envolve traballadór informál hamutuk 5.588.
Notísia relevante: MAE aloka millaun $6.3 ba PMOPA
Jornalista : Natalino Belo
Editór : Evaristo Soares Martins
