Don Virgílio Kardeál : hasoru kampaña-ElPar, Igreja prepara orasaun própriu
DILI, 03 abril 2023 (TATOLI)— Don Virgílio Kardeál do Carmo da Silva, SDB, hateten, Igreija Katoliku prepara ona orasaun própriu hasoru kampaña no Eleisaun Parlementar (ElPar) tinan 2023.
“Uma-Kreda deside tiha ona iha nivél Konferénsia Episkopal ninian, fulan ida molok ita hahú kampaña no eleisaun dahuluk sei fó sai orasaun própriu ida ne’ebé daudaun ne’e prepara hotu ona no sei fahe ba parókia hotu hafoin loron pasku ka semana santa ida ne’e. Orasaun ne’e atu konvida sarani hotu reza nune’e ita-nia eleisaun bele la’o ho di’ak liu,” Don Virgílio Kardeál do Carmo da Silva, SDB, hateten iha Kámara Ekleziástiku Lecidere, Dili, segunda ne’e.
Don Virgílio Kardeál nu’udar mos Arsebispu Arkidioseze Metropolitana Dili, ne’e hateten orasaun ne’e sei distribui ba kada parókia sira hafoin loron semana santa.
Don Virgílio Kardeál mos hateten tan katak orasaun própriu ne’ebé sei fahe ne’e, Konferénsia Episkopál ne’ebé reprezenta igreja Timór ninian sei hasai mós karta pastorál ne’ebé sempre hasai iha tempu Eleisaun Parlamentár. Objetivu orienta sarani sira oinsá prepara an nu’udar sarani tuir kampaña no eleisaun ho di’ak.
“Ita hotu hein, loron boot ne’e ramata mak distribui ba parókia sira hotu, atu sarani sira bele hasa’e hotu orasaun ne’e,” Don Virgílio Kardeál dehan.
Jornalista : Arminda Fonseca
Editora : Armandina Moniz
