iklan

NASIONÁL, EKONOMIA, HEADLINE

Don Virgílio Kardeál : Polítiku-sira tenke hatene servi povu

Don Virgílio Kardeál : Polítiku-sira tenke hatene servi povu

Don Virgílio Kardeál do Carmo da Silva, SDB. Imajen Tatoli/António Daciparu

DILI, 03 abril 2023 (TATOLI)— Don Virgílio Kardeál do Carmo da Silva, SDB husu ba partidu polítiku sira ne’ebé lakleur tan sei halo kampaña ba Eleisaun Parlamentár tinan ida ne’e, atu hatene servi povu no presiza banati tuir Jesus Kristu ne’ebé hanorin ema hotu atu serví ba malu.

Don Virgílio Kardeál nu’udar mos Arsebispu Arkidioseze Metropolitana Dili, hateten liafuan ne’e ba jornalista sira iha Kámara Ekleziástiku Lecidere,Dili segunda ne’e.

Don Virgílio hateten, hanesan hotuhotu hatene partidu polítiku maioria ne’e ema katóliku hotu, nune’e konvida sira atu hala’o sira-nia papél, no hatene katak agora tempu ida ne’ebé sira preokupa tebes ho atividade polítiku ninian. Maibé keta haluha nu’udar sarani aproveita mós semana santa ida ne’e hodi tuir didi’ak mistériu Jesus nia terus, mate no moris hias.

“Ita hotu reza semana santa ne’e mós sei motiva sira di’ak liutan atu haree ba Jesus Kristu ne’ebé horiseik ita hahí nu’udar Liurai. Nune’e Liurai ida ne’e mak tenke sai modelu ba ita-nia polítiku sira hotu katak ita hotu buka povu ida ne’e nia di’ak, no foti nasaun ne’e ninia dignidade mak ita hotu presiza banati tuir Jesus Kristu ne’ebé hatene serví,” Don Virgílio Kardeál hateten.

Nune’e Don Virgílio mós apela ba sarani sira iha tempu semana santa aproveita didi’ak hodi partisipa iha eleisaun Parlamentár ne’ebé sei mai.

“Kristu hanorin ita atu serví nune’e konvida ita hotu liuliu la’os partidu polítiku de’it maibé sarani hotu iha tempu kuarezma ne’e partisipa atividade hotu ho di’ak no haree malu ho oin midar,” nia dehan.

Jornalista : Arminda Fonseca

Editora     : Armandina Moniz

iklan
iklan

Leave a Reply

iklan
error: Content is protected !!