Komandu PNTL nomea Superintendente Xefe José Soares ba Komandante Operasaun Nasionál

DILI, 03 abríl 2023 (TATOLI) – Komandu Polísia Nasionál Timor-Leste (PNTL) nomea Superintendente Xefe José Soares ba Komandante Operasaun Nasionál Komandu Jerál PNTL liuhosi despaixu númeru 171/CG/PNTL/III/2023.
Komandante Jerál Polísia Nasionál Timor-Leste (PNTL), Komisáriu Jerál Henrique da Costa mós fó pose mós ba Superiór no Ofisiál PNTL nain-sia.
Aleinde ne’e, Komandante Jerál PNTL Komisáriu Jerál Polísia Henrique da Costa nomea mós ofisiál superiór nain ualu (8) hodi asume ba kargu xefia sira iha departementu sira ne’ebé iha Komandu Jerál PNTL.
Ofisiál Superiór nain ualu ne’ebé Komisáriu Jerál Henrique da Costa nomea mak tuir despaixu númeru 171/CG/PNTL/III/2023 nomea Superentendente Xefe Polísia Arquimino Ramos ba Komandante Komandu Pesoál no Formasaun Komandu Jerál PNTL.
Despaixu Henrique da Costa númeru 173/CG/PNTL/III/2023 nomea Superentendente Polísia Julia da Gama ba kargu Komandante Unidade Apoia Servisu (UAS) Komandu Jerál PNTL.
Despaixu Komandante Jerál Polísia númeru 172/CG/PNTL/III/2023 nomea Superentendente Emilio dos Santos ba Komandante Interinu Sentru Formasaun Polísia (CFP, sigla portugés).
Henrique da Costa liuhosi nia Despaixu númeru 8/CG/PNTL/I/2023 nomea Superentendente Polísia Asistente Polísia, Helena das Dores Alves ba Xefe Departementu Saúde PNTL.
Komandante Jerál PNTL Komisáriu Jerál Polísia, Henrique da Costa liuhosi Despaixu númeru 17o /CG/PNTL/III/2023 nomea Superintendente Asistente Carlito da Silva Adore ba kargu Xefe Departementu Relasaun Internasionál Komandu Jerál PNTL.
Komandante Jerál PNTL Komisáriu Jerál Polísia Henrique da Costa liuhosi nia Despaixu númeru 175 /CG/PNTL/III/2023 nomea Inspetór Xefe Polísia Ricardo Kurniwan Moniz Xefe Gabinete Komandante Jerál PNTL Komisáriu Jerál PNTL.
Komandante Jerál PNT Komisáriu Jerál Polísia Henrique da Costa liuhosi nia despaixu númeru 172 /CG/PNTL/III/2023 nomea Inspetór Xefe Polísia José Lino ba kargu Xefe Gabinete Segundu Komandante PNTL, Komisáriu Pedro Belo.
Komandante Jerál PNT Komisáriu Jerál Polísia, Henrique da Costa liuhosi nia despaixu númeru 5/CG/PNTL/III/2023 nomea Inspetór Virgilio Correia ba Xefe Departamentu Asesória Juridika Komandu Jerál PNTL.
Hafoin serimónia nomeasaun no pose ba Ofisiál Superiór PNTL nain sia, Komandante Jerál PNTL Komisáriu Jerál Polísia Henrique da Costa, hateten nomeasaun atu priénse estrutura Komandu PNTL ne’ebé mak mamuk hela.
“Ida ne’e hanesan prioridade lima ne’ebé hanesan iha ha’u nia deskursu hateten hanesan ita hotu akompaña katak oinsá atu jere jestaun internál instituisaun ninian, tanba ne’e mak ohin ita realaiza pose ida ne’e”, Henrique da Costa hateten ba jornalista sira iha Kuartél Jerál PNTL, Caicoli segunda ohin.
Nia dehan, Komandu Jerál PNTL mós fó prioridade ba asuntu igualidade jéneru, oinsá fó oportunidade ba feto atu tur iha posizaun, tanba ne’e mak Komandu PNTL nomea no fó pose ba Superentendente Julia da Gama ba posizaun Xefe Departementu Unidade Apoia Servisu Komand Jerál PNTL inklui Superentendente Asistente Polísia, Helena das Dores Alves ba Xefe Departementu Saúde PNTL.
Ho nune’e, Henrique husu ba emposadu sira ofisiál Superiór nain ualu seluk atu servisu ho kompetente no funsaun idak-idak nian tuir funsaun ne’ebé define ona hosi lei ogánika PNTL nian.
Hatan kona-ba Komandante Operasaun Nasionál PNTL foun, Komisáriu Jerál Henrique da Costa promete sei ajuda Superentendente Xefe Polisia José Soares hodi halo operasaun ho di’ak tanba tinan polítika no la kle’ur tan tama ba kampaña no eleisaun oinsá koordena ho Komandante Munisipiu sira inklui Servisu Informasaun Polísia (SIP) hodi identifika fatin sira ne’ebé risku ba konflitu atu garantia seguransa iha eventu importante.
“Ita fó atensaun no fó orientasaun ba Komandante operasaun atu bele prepara efetivu sira, servisu hamutuk ho Servisu Informasaun Polísia nasionál to’o Komandu PNTL Munisipiu sira, atu iha tempu badak ita bele prepara planu operasaun atu ita hahú servisu fó seguransa ba iha kampaña polítika”, nia informa.
Iha fatin hanesan, Komandante Operasaun Nasionál PNTL foun Superentendente Xefe Polísia José Soares, kompromete sei servisu hamutuk ho Komandante Unidade Servisu Informasaun Polísia inklui Komandante Munisípiu sira atu trasa planu operasaun ba kampaña no eleisaun.
“Tanba iha 19 abríl 2023 sei akontese kampaña ba eleisaun, ita bele asegura kampaña hosi inisiu iha kapitál Dílí no munisípiu sira bele la’o ho di’ak”, nia afirma.
Nia mós husu ba sidadaun sira hotu atu apoia PNTL hodi asegura estabilidade perante kampaña no eleisaun tanba seguransa ne’e la’os iha PNTL nia liman maibé parte hotuhotu nian.
Jornalista: Natalino Costa
Editór : Zezito Silva

