Mantein ukun tabela klasifikasaun provizóriu, “Makikit Laulara” ain sorin tama ona ba kampiaun
DILI, 03 abríl 2023 (TATOLI) – Ekipa primeira divizaun AD SLB Laulara ho naran estimadu “Makikit Laulara” kontinua ukun tabela klasifikasaun provizóriu hafoin manán adversáriu Aitana FC ho rezultadu 4-3 iha jogu kontinuasaun Liga Futeból Timor-Leste (LFTL) ne’ebé hala’o iha Estádiu Munisipál Dili domingu loraik.
Hosi vitória ne’e SLB rekolla ona pontu hamutuk 14 hosi jogu dala neen no posibilidade ekipa ne’e nia ain sorin tama ona ba kampiaun LFTL époka ne’e.
Hanesan baibain ekipa rua hahú jogu lansa kedan kontra no atake ba malu tuir tékniku no abilidade ekipa ida-idak nian hodi hatama golu atu bele fó vitória ba sira nia ekipa.
Maibé iha jogu menutu tolu de’it jogadór SLB hatudu ona jogu ne’ebé estraordináriu tebes liu hosi jogadór Alexandro Kefi lansa kedan golu da-uluk hodi muda rezultadu ba 1-0.
Maske golu ona 1-0 maibé Aitana la lakon esperansa nafatin hatudu jogu ne’ebé brillante atu halo empata jogu ne’e, avansadu Aitana luta makas tebes ikus mai iha menutu 30 jogadór Gilson Reis bainhira bola barullu iha liña oin SLB nian Gilson lansa kedan golu ida hodi muda rezultadu ba 1-1.
Ho rezultadu ne’e halo jogadór parte rua luta makas tebes iha kampu laran be nahe aan ho dut matak be mamar atu prodúz tan golu ruma, nune’e bele fó vitória ba ekipa ida-idak nian.
Ho esforsu SLB nian ne’ebé másimu la hela de’it hanesan esforsu tanba iha menutu 36 jogadór SLB Jhon Frits responde golu ida ba Aitana hodi muda kedan rezultadu ba 2-1 halo Aitana atrapalla iha kampu laran.
Hosi golu ne’ebé SLB halo hanesan golu ikus ba ekipa rua tanba menutu primeira, iha parte termina laiha tan golu ruma mak akontese ba ekipa rua.
Hakur ba segunda parte ekipa rua nafatin mantein ho pozisaun ne’ebé klaru hanesan primeira parte hodi lansa kontra no atake ba malu maibé Aitana hatudu jogu ne’ebé kapas tebes nune’e iha menutu 58 jogadór Mamadou Konde responde golu ida ba SLB muda kedan rezultadu ba 2-2.
Hosi golu ne’e helo SLB susar atu hatudu jogu maibé sira nafatin esforsu ho ambisaun makas iha menutu 75 jogadór Zenivio Mota lansa tan golu id aba Aitana muda rezultadu ba 3-2, hosi golu ne’e halo ritmu SLB nian sa’e makas kedan iha menutu sira ne’e to’o menutu 77 jogadór Mouzinho de Lima termina golu ikus hodi muda rezultadu ba 4-2.
Maske nune’e jogadór Aitana sira nafatin hatudu jogu ne’ebé furak iha kampo laran maske lakon ona golu rua maibé jogadór estranjeiru Mamadou halo tan golu ida hatur rezultadu metin ba 4-3 to’o jogu termina laiha tan golu ruama amk akontese tan ba ekipa rua.
Ho nune’e vitória termina ba SLB hodi iha direitu absolutamente ba pontu tolu no Aitana hela ho derrota hodi tur liu iha liña mean tabela klasifikasaun provizóriu nian.
Eskuad SLB:
Filonito Nougueira(12), Bakayoko ozi (2), Micehl Hutabarat (26), Jhon Frith (6), Cristovão Fernandes (23), Filipe Oliveira(24), Fernando de Carvalho (3), Jeremias Baptista (69), Kornelis Portela (11), Alexandro Kefi (21), Mouzinho de Lima (10).
Suplente:
Andrew Mensah (13), Tomas Sarmento (4), Natalino da Costa(8), Nidio Alves (93), Aldo Amaral (19), Domingos Ribeiro (22), Alexandro (9), Norbert Gonçalves (14), Vabio Pires (28), Marques de Carvalho (29), José Pinto (27), .Vabio Pires (28).
Treinadór: Julião Monteiro
Eskuad Aitana:
Tomas Freitas (98), Dnilo Alves (2), Roberto Maia (28), Pascoal Ximenes (17), Francelino Belo (22), Rigeberd Lay (7), Osvaldo Freitas (24), Gabriel da Costa (14), Luis da Silva (8), Jilson dos Reis (10) no Mamoudou Conde (27).
Suplente:
Celestino da Costa (30), Osvaldo Freitas (24), Emiliano Pereira (5), Rivaldo Martins (13), Herminio Moniz (31), Natalino Morais (16), Miguel Araujo (9), Alexandre Nogueira (6), Helder Valente (46), Wiliam Vong (21), Benjamin Amaral (25) no Rivaldo Correira (77).
Treinadór: José Fonseca
Jogu ne’e dirije hosi árbitu prinsipál Pedro Carvalho, juiz liña Filomeno da Silva, Henrique Pereira no árbitru rezerva Eufrasio da Costa.
Tabela klasifikasaun provizóriu primeira divizaun
- AD SLB Laulara pontu 14
- AS Ponta Leste pontu 10
- Emmanuel pontu 9
- Assalam pontu 8
- Porto Taibessi pontu 7
- Karketu pontu 6
- Academica pontu 5
- Ultramar pontu 4
- Aitana pontu 4
Jornalista: Hortencio Sanchez
Editór : Zezito Silva
