Proposta hosi Baucau ba Ministra Saúde, transforma postu saúde Nunira
BAUCAU, 03 abríl 2023 (TATOLI) – Servisu Munisipál Saúde Baucau lideradu Domingos Reinaldo da Costa Guterres, sei hato’o proposta ba Ministra Saúde, Odete Maria Freitas Belo, atu transforma postu saúde ba sentru saúde ne’ebé lokaliza iha área Darafae, suku Nunira, postu administrativu Laga.
Diretór Servisu Munisipál Saúde Baucau, Domingos Reinaldo da Costa Guterres, esplika, desizaun ba proposta ne’e bazea ba pedidu hosi autoridade suku inklui observasaun hosi saúde Baucau tanba esensiál no prienxe kritéria atu transforma postu saúde iha suku Nunira ba sentru saúde.
“Proposta, aban ita sei hatoo ba iha nasionál, sé Ministra Saúde aprova bele aumenta tán sentru saúde iha Baucau, postu Laga,” nia informa ba Agência TATOLI iha Vila Antiga, segunda ne’e.
Razaun prinsipál hosi proposta ne’e tanba populasaun iha área suku Nunira barak purvolta 17.500-resin, distánsia dook atu asesu ba sentru saúde Laga inklui infraestrutura postu saúde Nunira sufisiente atu transforma ba sentru saúde.
Servisu Munisipál Saúde Baucau hala’o ona koordenasaun ho autoridade suku Nunira nune’e proposta estabelesementu sentru saúde asinadu ona no hein hatoo ba Ministériu Saúde (MS) atu foti desizaun.
Bainhira estabelese ona, sei fasilita komunidade hosi suku viziñu hanesan suku Boleha, Namanei no komunidade hosi área Lawai, munisípiu Lautém bele halo tratamentu ho distánsia ne’ebé besik.
Nia dehan, atu establese sentru saúde importante mak pesoál saúde hanesan; médiku enfermeira, parteira no tékniku aliadu no fasilidade infraestrutura nune’e bele kompleta malu hanesan ho sentru saúde sira seluk ne’ebé antes ne’e estabelese ona.
“Kuandu aprova ona presiza aumenta tán rekursu umanu no transporte,” Domingos Guterres akresenta.
Entretantu munisípiu Baucau iha sentru saúde hamutuk sia komposta hosi Uailili, Laga, Vemasse, Venilale, Quelicai, Baguia, Riamare no Bucoli inklui postu saúde hamutuk 29 ho totál funsionáriu hamutuk na’in-354.
Jornalista : Natalino Belo
Editór : Evaristo Soares Martins
