Reuniaun KM CPLP iha Luanda aprova rezolusaun tolu
DILI, 03 abríl 2023 (TATOLI) – Ministra Negósiu Estranjeiru no Kooperasaun (MNEK) Adaljiza Albertina Xavier Reis Magno, hateten reuniaun estraordináriu Konsellu Ministru (KM) iha Luanda konsege aprova Estatutu CPLP, alterasaun kona-ba regulamentu observadór sira asosiadu no kriasaun asuntu ekonómiku emprezáriu iha Sekretariadu Ezekutivu CPLP.
“Iha reuniaun ne’e konsege aprova rezolusaun tolu, ida mak estatutu CPLP nian, ida mak rezolusaun alterasaun sobre regulamentu observadores asosiadu no ikus liu mak kriasaun asuntu ekonomika emprezáriu iha sekretariadu ezekutivu CPLP”, Ministra Magno dehan ba Agência TATOLI foin lalais ne’e.
Ministra salienta objetivu prinsipál hosi reuniaun ne’e aborda asuntu balu ne’ebé sai proposta ba nasaun Angola hanesan prezidénsia rotativa ba CPLP.
Enkuantu Angola konvida Ministru Negósiu Estranjeiru iha nasaun membru sira hotu atu partisipa iha reuniaun prinsipál hodi halo debate polítiku ho tema “ O Papel dos Mares e Oceanos na Projeção Internacional da CPLP”.
Rekorda fali katak dezde Prezidente rotativa Timor-Leste nian iha tinan 2014-2016 Timor-Leste nia proposta mak foku ba kooperasaun ekonómika.
“Entaun agora daudaun Angola mak hanesan Prezidente maibé sira nafatin tau importánsia ba pilar ekonomia nian ne’ebé iha ita-nia tempu ita mós tau importánsia ida ne’e kapas tebes”, ministra afirma.
Iha oportunidade ne’e, Ministra Magno mós halo vizita kortezia ba Ministru Negósiu Estranjeiru Angola nian hodi ko’alia kona-ba oinsa atu hametin relasaun bilaterál entre Timor-Leste no Angola.
“Ministru Negósiu Estranjeiru Angola informa mai ha’u katak sira atu loke sira nia embaxada iha Timor-Leste, entaun ha’u mós konvida sira atu nasaun rua haree ba kooperasaun ekonomia nian”, nia hakotu.
Nasaun membru CPLP kompostu hosi, Angola, Brazíl, Cabo Verde, Giné-Bisau, Giné Ekuatoriál, Mosambique, Portugál, São Tomé e Prínsipe no Timor-Leste.
Jornalista: Hortencio Sanchez
Editór : Zezito Silva
