DILI, 04 abril 2023 (TATOLI)—Autoridade Inspesaun no Fiskalizasaun Atividade Ekonómika no Alimentár, Institutu Públiku (AIFAESA,I.P), iha fulan ne’e, sei lori fali amostra mina Symphoni ba halo teste laboratóriu iha Ajénsia Nasional Kontrolu Medikamentu no Alimentu (BPOM) Indonézia.
Inspetór Jerál, Ernesto Monteiro, hateten objetivu AIFAESA,I.P sei lori fali amostra mina Symphoni ne’e ba halo teste iha laboratóriu Indonézia tanba, amostra ne’ebé halo ona teste iha laboratóriu Timór foin fó sai de’it rezultadu ba mikro biolójia maibé ba kímiku rasik seidauk.
Notisia relevante : Frederico Bosco: rezultadu teste Mina Shimponi seidauk konklui
“Tanba ne’e, Ministériu Saúde halo enkontru ho autoridade hotuhotu, hili AIFAESA,I.P mak sei lori amostra ba. Ho ida ne’e, ha’u hakarak lais liu iha semana ida ne’e, haruka ba ona, nune’e, ita bele hatene sedu rezultadu hosi mina ne’e rasik. Tanba ita deskonfia mina ne’e ladi’ak ba ema-nia saúde,” Ernesto Monteiro dehan ba Agência Tatoli, iha nia-knaar fatin, Matadoro, Dili, tersa ne’e.
Nia dehan, kona-ba atu hatene rezultadu mina Symphoni ne’e, tuir regulamentu BPOM rasik, bainhira amostra to’o ba sira halo teste liu loron 15 mak foin bele hatene rezultadu.
“Ita hotu hein, bainhira amostra ne’e lori ba ona, mak foin hatene rezultadu,” nia hateten.
Jornalista : Arminda Fonseca
Editora : Armandina Moniz
