Atleta SEA Games na’in rua ho problema passaporte
DILI, 04 abríl 2023 (TATOLI) – Vise Prezidente Federasaun Timor-Leste Atletizmu (FTLA) Elias de Deus, informa atleta selesaun nasionál hosi modalidade hitu ne’ebé atu ba kompete iha SEA Games Kamboja tinan ne’e, so na’in rua de’it mak ho problema passaporte.
Atleta hirak ne’e hosi Federasaun Taekwondo Timor-Leste (FKTL), nia mak Abriana Abílio da Siva no FTLA mak Manuel Belo Amaral.
“Hosi atleta sira hotu só atleta na’in rua ida hosi Atletizmu no ida fali hosi Taekwondo nian, maibé ida atletizmu nian ne’e ami federasaun halo esforsu, hahú janeiru mai ne’e ita-nia atleta na’in ida naran Manuel Belo Amaral nia passaporte mate ona, ami foti inisiativa atu ba renova iha 15 janeiru, ba-trata ona iha Diresaun Nasionál Notariadu maibé labele foti passaporte tanba kaderneta laiha maibé ami selu ona ate agora laiha ne’e mak problema ba ami nia atleta”, Elias dehan ba Agência TATOLI iha Jináziu Dili, ohin.
Ho situasaun ne’e FTLA koordena kedan ho Sekretáriu Estadu Juventude no Desportu (SEJD) atu bele haree hodi tenta ko’alia ho notariadu atu bele fasilita.
“Maibé ita ko’alia ona ho SEJD, sira sei haree hela oinsa atu ko’alia ho notariadu atu trata urjente atu ita-nia atleta ne’e bele hetan passaporte, ida ne’e bazea ba reuniaun ikus ne’ebé ami hala’o ho SEJD foin lalais ne’e”, nia dehan.
Enkuantu atleta hosi modalidade Taekwondo mós hasoru problema passaporte tanba durante ne’e bee kona passaporte halo kuak ho nune’e prezudika atleta ne’e nia partisipasaun iha SEA Games Kamboja tinan ne’e, tanba Timor-Leste rasik to’o agora seidauk iha kaderneta passaporte.
Atleta modalidade hosi atletizmu ne’ebé prepara ba SEA Games hamutuk na’in lima mak hanesan, Felisberto de Deus, Maunel Belo Amaral, Joanito Fernandes, Rosalino Ximenes no Angela Freitas.
Modalidade hirak ne’ebé sei ba kompete iha eventu ne’e mak Futeból, Taekwondo, Atletizmu, Karate-do, Siklizmu, Boxe no Voleiból Praia.
Dadaun ne’e, modalidade Futeból no Atletizmu mak prepara iha ida-idak nia fatin maibé Boxe, Siklizmu, Voleiból Praia, Taekwondo no Karate-do mak hela iha kajerna Polísia Militár (PM) Quintal-Boot Dili.
Jornalista: Hortencio Sanchez
Editór : Zezito Silva
