CNE finaliza ona atividade edukasaun sívika iha Baucau
BAUCAU, 04 abríl 2023 (TATOLI) – Komisaun Nasionál Eleisaun (CNE, sigla portugés) finaliza ona atividade edukasaun sívika iha munisípiu Baucau.
Diretór CNE Munisípiu Baucau, Esmeraldo Damião Belo, esplika, atividade refere abertura iha loron-24 no finaliza iha loron-31 fulan-marsu ne’ebé hala’o iha postu administrativu neen, munisípiu Baucau.
“Agora hotu ona, ita sei hein tán faze daruak ka para ona. Ida-ne’e hein de’it orientasaun hosi nasionál,” Diretór CNE munisípiu Baucau informa ba Agência TATOLI iha Vila Nova, tersa ne’e.
Matéria importante iha atividade refere komposta hosi órgaun administrasaun eleitorál, kampaña eleitorál, krime eleitorál, resensiamentu eleitorál no atualizasaun baze dadus inklui sistema eleitorál.
Atividade refere partisipa hosi estudante ensinu sekundária no membru organizasaun arte-marsiál ho total partisipante na’in-150 iha kada postu administrativu.
“Ita espera katak ho atividade ne’e sufisiente ona ba sira hodi partisipa iha loron eleisaun parlamentár fulan maiu,” Esmeraldo Belo akresenta.
CNE Baucau rasik preparadu atu hasoru eleisaun parlamentár liuhosi formasaun kona-bá apuramentu iha nasionál no kontinua hein kalendáriu kampaña partidu polítiku ne’ebé sei aprova liuhosi plenária iha nasionál.
Jornalista : Natalino Belo
Editór : Evaristo Soares Martins
