Eskola 10-resin afetadu dezastre naturál seidauk hetan apoiu material emerjénsia
DILI, 04 abríl 2023 (TATOLI)–Diretór Nasionál Asaun Sosiál Eskolár (DNAE), Joaquim Martins, hateten eskola ne’ebé afetadu dezastre naturál iha inísiu janeiru 2023 hamutuk 27 ne’e, iha eskola liu 10-resin mak seidauk hetan apoiu materiál emerjénsia tanba dalan ladi’ak.
“Ita konsege identifika ona totál eskola hamutuk 27 hosi postu administrativu hitu, munisípiu lima ne’ebé mak ita konsege halo ona levantametu dadus hotu ona no konsege distribui ona materiál emerjénsia ba eskola sira. Maibé, eskola 10-resin mak seidauk hetan material emerjénsia,” Joaquim Martins hateten ba Agência iha ninia servisu fatin Vila Verde, tersa ne’e.
Eskola sira-ne’ebé maka hetan ona apoiu material emerjénsia mak hanesan eskola Ensinu Báziku Filiál (EBF) Telecom Ainaru, hosi Munisipiu Viqueque mak EBF Watumakluli postu administrativu Ossú, EBF Oskaia iha postu administrativu Uatulari, EBF Iraler, EBF Nahaek, EBF Lokloko Uatulari, EBF Kainualita postu administrativu Viqueque no mós EBF Talo iha Lacluta nian.
Nune’e mós, hosi munisipiu Bobonaro eskola EBF ida iha Tapo, eskola EBF Wanamor Kotomoluru, postu Lospalos, munisípiu Lautém, EBF Quatru Montanhas Ainaro, EPE Likidoe iha munisípiu Aileu, maibé iha kuaze eskola 10-liu mak seidauk hetan apoiu material emerjénsia tanba dalan atu asesu ba eskola sira-ne’e ladi’ak.
“Ita identifika iha ona eskola liu 10-resin mak seidauk hetan apoiu materiál emerjénsia tanba dalan ladi’ak maibé ita seidauk simu dadus verifikasaun hosi eskola ne’ebé de’it mak seidauk bele hetan apoiu emerjénsia relasiona ho dalan ne’ebé ladi’ak,” nia dehan.
Tanba ne’e, dirasaun nasionál asaun sosiál eskolár kontinua servisu hamutuk ho dirijente sira iha eskola sira-ne’ebé seidauk hetan distribuisaun materiál emerjénsia atu pasa nafatin informasaun bainhira kondisaun dalan ka estrada di’ak ona, ekipa emerjénsia bele asesu hodi distribui material ba eskola sira-ne’e.
Nia informa, ba eskola sira ne’ebé maka hetan ona apoiu materiál emerjénsia, DNASE kontinua halo monitorizasaun atu buka hatene materiál sira-ne’ebé Ministériu apoiu ne’e eskola sira utiliza duni hodi hadi’a eskola sira ka lae.
Tanba, apoiu sira-ne’ebé mak Ministériu kontinua fó ba eskola sira-ne’e mai hosi apoiu parseiru sira-nia tulun hanesan UNICEF, ne’eduni Dirasaun presiza halo monitorizasaun hodi buka akompaña prosesu sira, atu nune’e eskola hamutuk ho konsellu dos país bele aselera prosesu reabilitasaun ne’e.
Entretantu, eskola lubuk ida mak seidauk rezolve difikuldade ne’ebé sira enfrenta kona-ba distribuisaun material emerjénsia ba eskola sira, maibé sira kontinua simu nafatin proposta hosi kada Munisipiu sira relasiona ho problema dezastre naturál ne’ebé akontese.
Iha munisipiu Ainaro iha eskola tolu (3), iha Bobonaro eskola ida iha EBF Mojob, hosi Lautém iha EBC Mehara no Pre-Eskolár ida, iha Liquiça iha eskola EBF ida (1) no mós Manatuto iha eskola ESG Paralelu ida-ne’ebé lokaliza iha Laclubar.
Jornalista : Tomé Amado
Editór : Cancio Ximenes
