PNTL sei la tolera sidadaun ne’ebé tenta instabiliza kampaña eleitorál no eleisaun

DILI, 04 abríl 2023 (TATOLI) – Segundu Komandante Jerál Polísia Nasionál Timor-Leste (PNTL), Komisáriu Polísia, Pedro Belo, hateten Komandu Jerál PNTL sei la tolera kuaker sidadaun ne’ebé de’it mak tenta atu hamosu krime eleitorál durante kampaña no eleisaun parlamentár.
“Ba kampaña no eleisaun, ami aviza kedas, atu lao tuir lei no disipliña, labele tuir ita-nia hakarak. Kuandu tuir ita-nia hakarak mak ami sei tau lei no orden. Ida ne’e la’os ameasa malu, maibé ida ne’e tenke. Maluk sira ne’ebé mak prepara atu halo krime karik di’ak liu nonok, lalika halo no lalika book”, Komisáriu Polísia Pedro Belo hateten hafoin remata reuniaun ho ofisiál superiór PNTL iha Timor-Plaza, tersa ne’e.
Tuir nia, Komandu PNTL hakarak situasaun iha kampaña no eleisaun la’o ho di’ak, atu povu bele tuir eleisaun ho di’ak.
“Ita hakarak situsaun ne’e tenke seguru ba ema hotu atu ba tuir kampaña no eleisaun ho di’ak, ami sei laiha toleránsia ba ema kriminozu ida atu halo fali krime tun sae”, Pedro Belo realsa.
Tuir Komisáriu PNTL katak PNTL identifika ona fatin sira ne’ebé konsidera sai hanesan risku ba poténsia ba krime eleitórál no eleisaun parlamentár.
“Iha teritóriu tomak ba fatin sira ne’ebé ami konsidera poténsia atu hamosu krime iha kampaña no eleisaun, ne’e ami identifika hotu ona. Tuir mapamentu ami-nia ne’e dadus kompletu no ami prontu no sei responde tuir ida ne’e”, Komandante Pedro Belo afirma.
Hatan kona-ba efetvu hira maka sei koloka hodi asegura kampaña no eleisaun, Komisáriu Pedro, hateten ne’e desizaun Komandu iha nivél tátika, Komandu sei la fó sai públiku totál efetivu hirak mak atu koloka iha kampaña no eleisaun parlamentár.
Maibé sertamente Komandu sei koloka hotu Unidade tolu hanesan Unidade Polísia Marítima (UMP), Unidade Patrollamentu Polísia (UPF) no Unidade Espasiál Polísia, membru hosi Komandu Jerál PNTL atu apoia serguransa.
“Ita bo’ot sira haree hosi Sentru Formasaun Polísia no UEP, hahú halo treinamentu ba membru sira oinsá atu halo serguransa iha kamapaña no eleisaun atu ita-nia membru sira ne’e bele halo seguransa ho di’ak”, Komisáriu Polísia Pedro Belo haktuir.
Pedro Belo reforsa katak rekursu no fasilidade Komandu PNTL sufusiente atu reponde ba situasaun sira perante kampaña no eleisaun.
“Ha’u haree katak buat hotu ne’ebé maka PNTL iha sufisiente atu halo servisu, ita hotu hatene sasan ne’ebé mak seidauk iha, ita labele responde hotu iha tempu badak maibe horsida ami tenta jere saida maka iha hodi responde ba situasaun sira”, nia konklui.
Jornalista: Natalino Costa
Editór : Zezito Silva

