HNGV rejista 27 bebé mate iha inan nia kabun laran
DILI, 05 abríl 2023 (TATOLI) – Xefe Departamentu kontrolu Kualidade Komunikasaun Sosiál iha Hospitál Nasionál Guido Valadares (HNGV) Sara Maria Xavier, informa iha janeiru to’o marsu, bebé sira ne’ebé mate iha inan nia kabun laran hamutuk 27.
“Totál bebé ne’ebé mak mate iha inan nia kabun laran hamutuk 27, husi ne’e fresh stilberth ka mate mortu fresku hamutuk na’in sia no sira ne’ebé mak mate ho kondisaun maceradu iha 18″, Sara Maria Xavier, hateten iha nia kna’ar fatin HNGV, ohin.
Nia informa, bebé sira ne’ebé mak mate fresh stilbesth iha maternidade ne’e tanba sira nia pezu kiik.
”Bebé sira mate iha inan nia kabun laran tanba ho kilo ne’ebé mak kikoan los, depois ho komplikasaun oinoin, entaun bebé sira labele seguru iha inan nia kabun laran”, nia esplika.
Nia dehan, bebé sira ne’ebé mak mate ho maceradu ne’e sira mai nanis husi sentru saúde sira ka mai husi uma, ida ne’e presiza atu atensaun mak iha kuidadu antenatal, inan sira isin rua sira presiza halo kuidadu antenatal, atu bele deteta sedu.
Nia revela, HNGV iha esforsu ona atu redúz númeru bebé mate iha inan nia kabun laran iha maternidade, liuhusi dezenvolve pakote bebé seguru, ne’ebé mak adopta husi Austrália nian, maibé adapta tuir ita-nia situasaun no kondisaun iha Timor-Leste, atu ita bele prevene bebé mate iha inan nia kabun laran.
Nia afirma, komponente husi bebé seguru fó konsellu ba inan isin rua ka nia parseiru hodi hapara fuma, bazea ba peskiza katak suar husi sigaru ka membru família ne’ebé mak fuma ativu haleu inan ne’ebé mak durante isin rua, depois inan horon aisuar sira husi dapur laran mak maka’as mós risku ba inan sira atu hetan bebé mate iha kabun laran.
“Entaun buat sira ne’ebé mak ita atu halo mak fó promosaun saúde nafatin liuhosi sentru saúde komunitária sira, atu inan sira labele fuma durante isin rua no inan sira bele horon sigaru nia suar ne’ebé mak iha ninia ambiente uma laran, ne’ebé inan sira presiza uza maskara atu redúz kontatu ho sigaru suar, ahi suar, motor no kareta nia suar”, nia salienta.
Tanba ne’e, nia husu ba inan sira, bainhira inan isin rua presiza hakbesik aan ba sentru saúde sira atu hetan konsulta antenatal iha ne’eba tanba médiku no parteira sira sei sukat sira nia altura hodi kompara ho sira nia idade, bainhira bebé nia pezu menus mak bebé ne’e ladún kresimentu ho di’ak, entaun parteira sira buka tuir kauza husi bebé ne’e hodi fó atendimentu ba inan ne’e.
Jornalista : Felicidade Ximenes
Editór : Zezito Silva
