MEJD rejista profesór rihun 25 iha territóriu nasionál

DILI, 05 abríl 2023 (TATOLI)–Diretór Jerál Administrasaun no Jestaun Finansa Ministériu Edukasaun Juventude no Desportu (DJAJF-MEJD), Antoninho Pires, hateten totál profesór rejistradu iha territóriu nasionál hamutuk rihun 25,203.

Nia hatutan, dadus sira-ne’e kompostu hosi profesór permanente, profesór voluntáriu inklui profesór reklamante ne’ebé ministériu rekolla hosi tinan 2021 mai to’o ohin loron.

“Ha’u hanoin hanesan ne’e kona-ba profesór sira-ne’ebé mak rejistadu iha Timor laran tomak ne’e, ita fahe ba grupu tolu. Primeiru grupu ita bolu profesór permanente, profesór voluntáriu no ikus profesór reklamante sira,” Antoninho Pires hateten ba Agência Tatoli iha nia kna’ar fatin, Vila Verde, kuarta ne’e

Profesór permanente sira-ne’e sura hahú hosi Pre-Eskolár ba to’o ensinu sekundáriu jerál tékniku vokasionál, no hosi dadus ne’ebé Ministériu Edukasaun rejista profesór permanente de’it besik rihun 11-kuaze 10.900-resin, hosi fali profesór kontratadu nian ne’ebé mak tama ona iha lista rejistu MEJD nian kuaze 4.903.

Hosi totál dadus profesór 15.803 ne’ebé kompostu hosi profesór permanente 10.900 no profesór voluntáriu 4.903 ne’e, kuaze profesór voluntáriu barak liu.

Tuir nia, hahú hosi 2021 bainhira Ministériu Edukasaun Juventude no Desportu halo verifikasaun totál profesór voluntáriu iha 2.915.

Hosi lista formal 2.915, profesór voluntáriu ne’ebé verifika ona iha 2021 maibé sei mosu tan lista adisionál kuaze 3.500 profesór voluntáriu ne’ebé mak hein hela sira-nia diretu atu hetan mós verifikasaun, ho nune’e totál profesór voluntáriu ne’ebé mak hetan ona verifika inklui lista adisionál nian hamutuk kuaze 6.415.

“Ha’u hakarak dehan profesór voluntáriu sira-ne’ebé mak tama iha lista adisionál ne’e, ita konsidera nu’udar lista foun mai hosi tinan 2017 to’o 2020. Ne’eduni, lista sira-ne’e ita konsidera maibé sei tama ba iha prosesu tuir mai,” naia dehan.

Ko’alia kona-ba dadus profesór reklamante sira nian, nia dehan, lista sira­ne’e tama hotu iha lista voluntáriu nian, ne’eduni hosi lista profesór reklamante sira-ne’ebé MEJD rejista ona kuaze iha 3.800 ne’ebé fahe ba grupu rua mak grupu primeiru lista adisionál nian kuaze 3.000 no grupu segundu lista ne’ebé verifikadu hamutuk 800.

“Ita agora kontinua halo selesaun ba lista reklamante sira iha segunda faze atu nune’e bele prenxe vaga sira-ne’e hotu, atu nune’e apartir 2023 ne’e bele hapara ona profesór voluntáriu iha eskola sira liuhosi sirkulár ida atu hateten katak laiha tan profesór voluntáriu iha eskola sira,” nia hateten

Sirkulár ne’e Ministériu sei hasai ba eskola públiku n privadu sira, ba eskola privadu sira depende ba sira-nia polítika maibé parte Governu liuhosi Ministériu Edukasaun sei la konsidera tan profesór voluntáriu atu eziste tan iha eskola sira.

Entretantu hosi totál profesór 25.203 ne’ebé rejistradu ne’e kuaze identifikadu ona iha profesór permanente na’in 2.000-resin mak tama ona iha lista reforma no sira-ne’ebé prepara ona atu tama ba idade reforma kuaze besik 1.800, no sira-ne’ebé hetan ona sertifikadu reforma hamutuk 900.

Ho nune’e, tuir nia, polítika ne’ebé mak Ministériu Edukasaun Juventude no Desportu halo ona mak ba profesór sira-ne’ebé mak tama ona ba permanente ne’ e MEJD sei halo esforsu hodi hadi’a sira-nia progresaun de karreira inklui profesór kontratadu sira, tanba dekretu-lei ne’ebé iaprova ona iha Parlamentu Nasional ne’e to’o agora seidauk hetan promulgasaun hosi Prezidente Repúblika.

Bainhira dekretu-lei ne’e mak promulga ona, Ministériu Edukasaun rasik sei halo fali manuál ida hodi hatama profesór kontratadu sira-ne’e ba fali dekretu-lei foun, atu nune’e sira bele goza rejime karreira.

Jornalista : Tomé Amado

Editór       : Cancio Ximenes