DILI, 04 abríl 2023 (TATOLI)–Ministériu Edukasaun Juventude no Desportu (MEJD) liu-hosi Dirasaun Nasional Asaun Sosiál Eskolár (DNASE) to’o agora seidauk simu informasaun imediata hosi servisu edukasaun Munisipál Manatuto kona-ba eskola tékniku Agrikultura Natarbora ne’ebé ahi han iha fulan-marsu ne’e.
Diretór Nasionál Asaun Sosiál Eskolár, Joaquim Martins, hateten nia rasik to’o agora seidauk simu informasaun ida kona-ba akontesimentu inséndiu iha eskola Tékniku Agrikultura Natarbora.
Karik iha informasaun ruma kona-ba kauza hanesan ne’e, sira sempre hetan kontaktu atu nune’e dirasaun bele haruka ekipa tun ba halo monitorizasaun, maibé to’o agora laiha informasaun ida mak sira simu kona-ba inséndiu iha eskola tékniku SPP Natarbora.
“To’o agora ita seidauk hetan informasaun ruma kona-ba eskola Tékniku Agrikultura Natarbora ne’ebé hetan gravidade hosi kauza ahi han eskola. maibé ami sempre iha koordenasaun di’ak ho servisu edukasaun Munisipiu sira atu nune’e informasaun imediata sira hanesan ne’e sira bele pasa mai ami. Depois, ita ho ekipa nasionál prontu atu bele ba monitoriza hodi bele haree kondisaun,” Diretór ne’e hateten ba Agência Tatoli iha ninia servisu fatin Vila Verde, tersa ne’e.
To’o agora, nia hateten, Ministériu Edukasaun Juventude no Desportu liu-hosi Dirasaun Nasionál Asaun Sosiál Eskolár seidauk simu informasaun kona-ba kauza hosi eskola ne’ebé ahi han iha area Natarbora, maibé kauza inséndiu ne’e rasik konsege levanta ona hosi Vise Prezidente Parlamentu Nasional, Maria Angelina Sarmento, liu-hosi reuniaun plenária iha loron 03 marsu foin lalais ne’e.
Deputada hosi Bankada PLP no Atuál Vise Prezidente Parlamentu Nasionál, Maria Angelina Sarmento, iha ninia intervensaun ne’e husu ba Ministériu Edukasaun Juventude no Desportu (MEJD) atu fó apoiu urjente ba estudante hosi Eskola Téknika Agrikultura Natarbora ne’ebé afeta hosi inséndiu foin lalais.
“Hakarak hato’o iha plenária ida ohin, informasaun ne’ebé ha’u haree rasik ho matan iha sábadu semana kotuk bainhira halo atividade kontaktu eleitorál iha postu administrativu Barique-Natarbora, iha semana rua liu ba por volta iha loron 17 ka 18 marsu, akontese inséndiu boot iha eskola SPP-Natarbora kauza hosi sirkuitu ahi nian. To’o agora seidauk apoiu ka intervensaun hosi Ministériu Edukasaun Juventude no Desportu (MEJD) liu-liu halo vizita ba estudante sira hodi haree sira-nia kondisaun, nune’e urjentemente presiza apoiu,”
Inséndiu ida-ne’e rezulta eskola ho estudante hamutuk na’in-29 mak sai vítima, tanba sira-nia dormitóriu ahi han totál no sasán hanesan dokumentu diploma, billete identidade, kartaun eleitorál no osan ne’ebé inan-aman haruka ba estudante sira atu selu eskola ahi han hotu. inklui sasán sira seluk mak hanesan roupa, kama, kulixaun hodi toba, sapatu, livru no materiál ba prátika nian hanesan xave, katana ho sira seluk ahi han hotu kedas.
Maria Angelina realsa liu-tan katak bainhira ninia halo vizita ba eskola ne’e nia haree kondisaun alunu sira nia triste tebes. Tanba inséndiu ne’ebé akontese iha sábadu entre 17 ka 18 marsu to’o agora seidauk hetan apoiu manutensaun ba eletrisidade sira, estudante sira besik fulan ida ona kontinua hela iha nakukun laran hodi kontinua hala’o sira-nia eskola
“Kondisaun alunu sira-nian, ita bele dehan triste tebes. To’o agora seidauk halo fila-fali manutensaun ba eletrisidade hosi EDTL ne’ebé mak sirkuitu hodi estraga fatin dormitóriu ne’e ahi han mutuk tiha. To’o agora ahi seidauk lakan, estudante sira kala-kalan estuda iha nakukun laran. estudante sira ne’e mai hosi munisípiu oioin,” nia dehan.
Vise Prezidente PN ne’e dehan, maske eskola Tékniku Agrikultura ne’e seidauk hetan apoiu manutensaun ba eletrisidade estudante sira hetan ona apoiu ba aihan ne’ebé mai hosi Ministériu Solidariedade Sosiál no Inkluzaun (MSSI) inklui madre sira.
Maibé, deputada ne’e haktuir iha enkontru plenária ne’e katak estudante sira la preokupa ho ai-han tanba sira iha ai-han sufisiente ne’ebé asegura hela iha armajen tanba ahi la han.
Karik ahi-han mós, estudante sira hateten sira sei iha ai-horis sira-ne’ebé kuda hela iha toos laran hanesan modo, batar maibé problema ba sira mak nesesidade sira seluk hanesan roupa, kulxaun, sabaun, ida-ne’e mak sira presiza tanba ahi han hotu.
Tanba ne’e, deputada bankada Governu ne’e konsidera maske MESSI no madre sira fó ona apoiu maibé Ministériu ne’ebé iha responsabilidade boot ba vida estudante sira-nian mak edukasaun.
“Ha’u halo vizita ba iha eskola ne’ebá to’o agora eskola ne’e seidauk hetan apoiu ka intervensaun hosi MEJD liu-liu halo vizita ba estudante sira hodi haree sira-nia kondisaun. Tanba ne’e, ami husu ba Ministru MAPKOMS atu ita-boot enkamiña urjente ba Ministériu Edukasaun atu bele halo asaun ruma hodi ajuda providénsia apoiu ba estudante sira. Tanba sira barak mak inan-aman dook ho situasaun ida hanesan ne’e, ita presiza fó atensaun ba sira,” nia dehan.
Depois rona tiha intervensaun no pedidu hosi deputada Maria Angelina Sarmento nian, Ministru Asuntu Parlamentár no Komunikasaun Sosiál (MAPKOMS), Francisco Jerónimo, rejista hela kestaun ne’e no sei enkamiña ba ministériu tutela atu bele tau atensaun.
Jornalista : Tomé Amado
Editór : Cancio Ximenes
