DILI, 05 abríl 2023 (TATOLI)–Ministru Ensinu Superior Siénsia no Kultura, Longuinhos dos Santos, hateten MESSK sei hapara kontratu ho bolseiru bolsa hakbiit no bolsa parsiál na’in-1.683 bainhira sira-nia valor menus ka la prienxe rekizitu ne’ebé mak define ona iha kontratu sira.
Nia hatutan, kritériu ba bolseiru sira-nian hanesan de’it no bainhira to’o tiha dalan klaran mak sira-nia valór la to’o ka monu, Governu sei foti desizaun hodi hapara kontratu ho bolseiru hirak ne’e.
“Ha’u hakarak foti ezemplu ida hanesan siénsia naturál sira iha valór ideks prestasaun ne’e tenke atinje 2,75, ne’e tenke atinje inklui siénsia sosiál tenke atinje 3,00. Maibé kuandu la atinje valór sira-ne’e, ita sei hakotu bolsa ne’e ho sira,” Ministru Longuinhos hateten ba jornalista sira hafoin rsmata enkontru Konsellu Ministru iha Palásiu do Governu, kuarta ne’e.
Tanba ne’e, mensajen VIII Governu Konstitusionál nian klaru ona ba jerasaun foun sira-ne’ebé sai benefisiáriu ba bolsa estudu sira, klaru ona katak tenke estuda beibeik, tanba ida-ne’e mak Primeiru-Ministru Taur Mata Ruak husu ba bolseiru sira.
Maibé, nia dehan, ba bolseiru sira-ne’ebé hatudu dezempeñu di’ak, bainhira ramata ona sira-nia estudu hanesan kbiit laek sira iha efeitu pozitivu ida, atu nune’e ba futuru kuandu hetan ona servisu bele kria kampu servisu rasik bele ajuda ona ekonomia família nian, tanba ne’e Ministériu iha programa ida hanaran monitorizasaun avaliasaun.
Programa ida-ne’e kria atu akompaña progresu saida mak bolseiru sira atinje ona iha sira-nia estudu sira, hodi nune’e bele relata ba Ministériu.
Maibé rezultadu hosi tinan kotuk nia seidauk aprezenta, tanba seidauk iha finalidade no bainhira hetan ona rezultadu mak foin halo aprezentasaun.
Tanba ne’e, Ministériu sempre halo koordenasaun ho Reitór sira iha kada Instituisaun Ensinu Superior públiku no privadu sira atu hatene progresu saida mak estudante bolseiru sira hatudu.
Tuir nia, ministru simu ona informasaun hosi instituisaun ensinu superiór balun katak iha bolseiru na’in-rua hosi tinan kotuk nian maka la marka prezensa to’o ohin loron, maibé bele konsidera katak bolseiru sira-ne’e lakohi atu hadi’a sira-nia futuru no taka dalan ba sira nia-an rasik, ne’ebé laiha problema ho Governu ne’ebé fó ona oportunidade ba sira.
“Ita simu ona informasaun katak ita-nia bolseiru sira hatudu dezempeñu di’ak, agora ita hein ninia rezultadu eskrita atu nune’e ita bele halo aprezentasaun maske iha bolseiru na’in-rua mak la marka prezensa,” nia dehan.
Jornalista : Tomé Amado
Editór : Cancio Ximenes
