PNTL garante selebrasaun misa paskoa sei la’o hakmatek

DILI, 05 abríl 2023 (TATOLI) – Komandante Tránzitu Polísia Nasionál Timor-Leste (PNTL), Munisípiu Díli, Inspestór Polísia, Domingos Gama, garante ba selebrasaun misa paskoa sei la’o ho di’ak.
“Ha’u garantia selebrasaun misa paskoa sei lao iha situasaun hakmatek no kontroladu”, Inspestór Polísia, Domingos Gama hateten ba jornalista Agência TATOLI iha Komandu PNTL Munisípiu Díli Caicoli, ohin.
Nia dehan, Komandu Munisípiu Díli liuhosi seguransa tránzitu rodoviáriu sei koloka membru tránzitu iha greja sira iha Díli laran atu kontrola movimentasaun ema, karreta no motór durante selebrasaun misa paskoa.
“Ita sei koloka ita-nia membru tránzitu sira bainhira iha missa selebrasau paskoa, atu asegura movimentu ema, karreta no motór durante selebrasaun loron bo’ot”, nia informa.
Domingos Gama husu ba motorosista sira ne’ebé halo viajen iha loron paskoa hosi foho mai Díli no hosi Díli bá foho atu kondúz karreta no motór ho kuidadu.
“Husu ba ita hotu atu halo viajen iha loron paskoa hosi foho mai Díli no hosi Díli bá foho ho kondúz karreta no motór ho kuidadu hodi prevene asidente”, nia konklui.
Jornalista: Natalino Costa
Editór : Zezito Silva

