Don Virgílio Kardeál : kinta-feira santa fó hanoin buat furak rua ba sarani sira
DILI, 06 abril 2023 (TATOLI)— Don Virgílio Kardeál do Carmo da Silva, SDB, hateten, selebrasaun kinta feira santa fó hanoin buat furak rua ba sarani sira mak, eukaristia no fase ain ka tuir tradisaun Katólika nian Jesus fase eskolante sira-nia ain.
Don Virgílio Kardeál nu’udar mos Arsebispu Arkidioseze Metropolitana Dili, dehan ko’alia kona-ba eukaristia, Jesus la ko’alia ho domin liafuan de’it maibé saran ninian an tomak, eukaristia nu’udar forsa ida no, forsa ne’ebé atu transforma ema-nia fuan, liuhosi eukaristia espíritu santu.
“Tanba liuhosi eukaristia esprítu santu bele transforma ita-nia fuan, hahalok no moris. Bainhira ita mai duni ho intensaun, nesesidade, no presiza duni, kinta feira santa fó hanoin ba ita katak buat furak rua eukaristia no fase eskolante sira-nia ain. Buat rua ne’e liga malu, ita la’os de’it iha altar maibé buat ne’ebé selebra iha altar konvida ita atu lori ba iha moris,” Don Virgílio Kardeál hateten liuhosi nia omília iha Igreja Katedral Dili, kinta ne’e.
Nia dehan, bainhira ba misa la’os atu tuir de’it maibé hola parte tanba iha misa ema hotu hasa’e idaidaik nia susar terus iha eukaristia. Tanba bainhira Amu lulik hasa’e tua no paun la’os paun no tua de’it mak hasa’e ba Aman Maromak maibé idaidak ba ho nia terus no susar hamutuk ho Amu lulik hasa’e iha altar leten.
Ba fase ain nian, kinta feira santa bolu ema-nia atensaun fase eskolante sira-nia ain. Ida ne’e jestu ida nu’udar extraordináriu, Jesus asume jestu umulidade ne’ebé extraordináriu, no hatudu ho jestu ruma, liuhosi nia hasai nia hatais foti tualla nia hakruuk to’o ba rai halo an hanesan ema kiik.
“Jesus tun hatudu halo nia an hanesan ema kiik, latauk atu halo kontaktu fíziku ho ita ema ninia mijeria, foer no sala. Nia halo hanesan ne’e, tanba nia hatene ita ema foer, sala na’in, nia la foer tanba nia sala laek ne’e duni nia tun, ita-nia foer sei la daet ba nia, maibé ninia di’ak mak sei da’et ba ita,” Don Virgíli haktuir.
Iha paskua ne’e mós fó hanoin dala ida tan kona-ba Maromak ninia domin boot ida ne’e. Nia tun to’o besik ema tanba de’it nia hakarak ninia di’ak ne’e bele da’et ba nia ema, atu di’ak ida ne’e bele transforma nia ema ne’ebé fiar nia.
“Jestu fase ain ninia ne’e Jesus husu ita atu lori nafatin. Jestu ida ne’e iha ita-nia moris, katak di’ak ne’ebé ita iha labele karak maibé fahe. Di’ak ne’ebé ita iha ba ita-nia maun alin sira,” nia dehan.
Ulun boot ba uma-kreda lokál ne’e husu sarani sira dehan, ohin hahú tridun paskua nian ne’ebé sei loke kontinua kontenpla ohin eukaristia aban Jesus iha kruz. Hotu tiha Jesus iha rate no moris hias, hotu-hotu hosik mistériu boot ida ne’e, tama idaidaik nia moris la’os ema mak transforma nia an maibé Maromak mak sei transforma ema-nia an.
“Ita reza atu liuhosi selebrasaun paskua ninian ida ne’e sai duni momentu ida importante ba ita hotu nia moris,” nia dehan.
Jornalista : Arminda Fonseca
Editora : Armandina Moniz
