Janeiru-marsu 2023, empreza hitu selu koima ba Estadu
DILI, 11 abril 2023 (TATOLI)— Autoridade Inspesaun no Fiskalizasaun Atividade Ekonómika, Sanitária no Alimentár, Institutu Públiku (AIFAESA,I.P), hahú hosi janeiru to’o marsu 2023 rejistu operadór ekonómiku hitu ne’ebe selu koima ba Estadu.
Diretór Departamentu Jurídiku no Kontraordenasaun, iha AIFAESA,I.P, Anósio Soares de Jesus Araujo, hateten empreza hitu ne’ebé selu koima ba Estadu ne’e tanba la kumpri lei konaba infrasaun administrativa hanesan faan produtu liu prazu, lisensa kontinua mate no la halo renovasaun, nomos materiál konstrusaun medida inferior sira konsidera frauda merkadoria.
“Iha tinan ida ne’e, AIFAESA,I.P rejistu prosesu kontraordenasaun hamutuk 43. Hosi infrasaun sira ne’e, infratór ne’ebé selu iha tinan ida ne’e hosi janeiru to’o marsu 2023 hamutuk empreza hitu. Ho ida ne’e sira tenke selu infrasaun ka koima ba kofre Estadu hamutuk $7.500. Maibé ita konta hosi 2017 to’o 2023 empreza ne’ebé selu koima ba Estadu hamutuk $8.083,66,” Anósio Soares de Jesus Araujo dehan ba Agência Tatoli, iha nia knaar-fatin Matadouro, Dili, tersa ne’e.
Nia esplika, prosesu kontraordenasaun ne’e, desde AIFAESA,I.P eziste iha 2017 to’o agora nia prosesu ne’e sempre trata hanesan, signifika ema ne’ebé komete infrasaun ne’e, prosesu kontinua la’o.
Empreza hitu ne’ebé komete infrasaun selu koima ne’e, balu komete iha tinan ne’e, no balu komete iha tinan kotuk no foin mai selu fali iha 2023. Sira ne’e inklui ona prosesu ne’ebé AIFAESA,I.P haruka ona Ministériu Públiku (MP).
“Ne’ebé empreza hitu ne’e, rua mak ita prosesu ba Ministériu Públiku foin halo pagamentu no AIFAESA,I.P uza nia kompeténsia ba sansaun administrativa. Ezemplu hanesan komersiante sira fa’an produtu liu prazu, lisensa mate ruma, no produtu ne’ebe estragus sei foti sansaun tuir dekretu-lei numeru 23/2009 kona-ba rejime infrasaun administrativa kontra ekonomia no seguransa alimentár,” nia hateten.
Jornalista : Arminda Fonseca
Editora : Armandina Moniz
