Autoridade husu komunidade kria pás durante períodu kampaña eleitorál iha Baucau
BAUCAU, 12 abríl 2023 (TATOLI) – Autoridade Administrasaun Munisipál Baucau husu komunidade atu kria pás durante períodu kampaña eleitorál to’o rezultadu eleisaun parlamentár tinan 2023 remata.
Sekretáriu Munisipál Baucau, Simão dos Santos Marques Pinheiro, esplika, eleisaun parlamentár tinan-ne’e ba dala-lima ona no esperiénsia hatudu ona iha eleisaun prezidensiál tinan-2022 iha Baucau la’o ho hakmatek nune’e husu atu komunidade iha Baucau kontinua hametin pás.
“Ita bele iha kór oinoin maibé tenke iha hanoin ida de’it mak asegura eleisaun parlamentár tinan-ne’e tanba sei hamosu figura di’ak hodi kontinua dezenvolve rai ida-ne’e,” Sekretáriu Munisipál Baucau hateten iha Vila Nova, kuarta ne’e.
Simão Pinheiro, argumenta, komunidade liuliu juventude hahú komprende no iha maturidade inklui komprende ona kona-ba lala’ok festa demokrasia ne’ebé realiza kada tinan-lima.
Eleisaun parlamentár nu’udar ponte atu sidadaun hotu uza direitu hili partidu polítiku sira ba reprezenta povu iha Parlamentu Nasionál (PN) no forma governu hodi dezenvolve Timor-Leste.
“Autoridade munisipál apela atu komunidade Baucau kontinua moris iha situasaun hakmatek nune’e ezerse direitu iha loron eleisaun mai,” Simão Pinheiro akresenta.
Autoridade Munisipál Baucau hamutuk ho Komisaun Nasionál Eleitorál (CNE, sigla portugés) deside ona fatin kampaña ne’ebé lokaliza iha kampu Darasula no Gariuai ho razaun fasilita seguransa sira halo prevensaun ba perturbasaun orden públiku durante kampaña eleitorál.
Jornalista : Natalino Belo
Editór : Evaristo Soares Martins
