Ekipa médika husi Austrália fó konsulta ba labarik hamutuk 50 iha HNGV
DILI, 12 abril 2023 (TATOLI) – Diretór Klíniku Hospitál Nasionál Guido Valadares (HNGV), Marcelino Correia, informa ekipa médika sirurjia pediatria husi Austrália fó konsulta ba labarik hamutuk 50 ne’ebé ho problema soe foer bo’ot.
“Durante ne’e ita enfrenta situasaun Covid-19, kuaze labarik barak mak afeta tee sai husi kabun sorin entaun ho prezensa husi ekipa médiku sira husi Austrália mai atu konsluta hodi halo operasaun ba tee oan ne’ebé mak tutan ba hodi hasai foer tanba sira ne’e uluk moris mai ita-nia liur ne’e tomak, entaun ita husu ajuda ba sira, espesialista husi Austrália mai halo tratamentu ba labarik sira ne’e durante semana rua iha ne’e”, Marcelino Correia dehan ba jornalista sira iha nia kna’ar fatin HNGV, ohin.
Nia informa, tuir dadus, labarik hamutuk 50 ne’ebé ho idade tinan hitu mai kraik mak ho problema tee sai husi sorin, maibé ekipa médiku Austrália labele halo operasaun dala ida tanba ho operasaun ne’e han tempu naruk no sira vizita durante semana rua de’it entaun tempu mínimu tebes.
“Tamba ne’e, ita haree labarik sira ne’ebé konsulta mak ekipa Austrália sira foti desizaun na’in hira mak bele opera no balun sei pendente tanba operasaun ne’e han tempu naruk, entaun sira sei halo planu vizita ita iha tinan oin mai mai”, nia adianta.
Ekipa médiku Austrália to’o iha Timor-Leste iha 12 to’o 22 abríl hafoin fila ba Austrália. Médiku hirak ne’e kompostu hosi doutór operasaun ida, anastésia ida, enfermeiru nain-tolu ne’ebé mak ajuda hodi halo tratamentu ba labarik sira.
“Husi vizita ne’e husi doutór operasaun ba labarik na’in ida, anastesia ida, enfremeiru na’in tolu, ne’ebé mak sei ajuda sira durante fó tratamentu iha ne’e no sira mós sei servisu hamutuk ho ita-nia médiku espesialista operadór, surjiaun sira ne’ebé mak iha ne’e no médiku anastesia no ekipa husi HNGV sei akompaña sira durante semana rua nia-laran” , nia konklui.
Jornalista : Felicidade Ximenes
Editór : Zezito Silva
