PN fó votu pezár ba falesimentu antigu Deputadu Manuel Castro

DILI, 12 abríl 2023 (TATOLI) – Parlamentu Nasionál (PN) liuhosi plenária estraoridinária hato’o votu pezár ba falesimentu ba antigu Deputadu Bankada Frente Revolusionáriu Timor-Leste Independente (FRETILIN) Manuel Castro ho vota afavór 32 kontra zero no abstensaun zero.
Iha sala plenária FRETILIN, CNRT, PD, KHUNTO, PUDD, UDT no Frente Mudansa, hato’o sentidu tristeza ba falesimentu antigu Deputadu hosi Bankada Fretilin, Manuel Castro
“Momentu ne’e ha’u lori kolega sira hosi Bankada CNRT nia-naran fó solidaridade ba família, hato’o ami nia kondolénsia ba família matebian”, Xefe Bankada CNRT, Duarte Nunes dehan iha PN.
Biografia:
Manuel Castro Pereira, moris iha Baha-Dato Suku Fatulia, Postu Admistrativu Venilale, Munisípiu Baucau iha loron 9 agustu 1961, oan hosi Manuel Castro Pereira (falesidu) no inan Claudina Belo (falesida) iha maun alin nain 11, nia nudar oan dahitu.
Hahú tama eskola Primaria Waidare, Aldeia Baha-Dato, Suku Fatulia, Postu Administrativu Venilale no kontinua nia primeira klase iha Díli to’o remata sesta klase. Depois ida ne’e Manuel Castro kontinua nia estudu iha Liceu to’o funu.
Ho nune’e, bainhira funu tama matebian hamutuk ho nia maun bo’ot Domingos Castro Pereira “ Laran Tos fila fali ba sira nia rai Baucau-Venilale hodi ba iha ai-laran durante tinan tolu.
Iha 1975-1978 ho idade ki’ik matebian Manuel Castro hahú mobiliza populasaun sira no lori apoiu lojístiku ba forsa sira iha ai-laran iha área Waimori zona 20 de maiu. Depois iha Tristruisaun baze apoia Manuel Castro evakua ba iha kosta súl.
Ho nune’e, bainhira nia simu orientasaun komandu mobiliza populasaun fila fali hodi evakua ba villa no Manuel Castro ho familia mós fila ba Venilale no iha ne’ebá nia hahú nia estudu fila fali iha Fatumaca.
Iha 1985-1986 matebian Manuel Castro simu responsavél iha área lojístika no informasaun iha Frente Cladestina. No iha 1998-1999 Manuel Castro simu rsponsavél hanesan asistenste polítiku zona Konselho Nasionál Resistensia Timorense ba Frente Klandestina.
Durante okupasaun entre 1986-1999 Manel Castro Pereira hanesan funsionáriu Indonézia, maske nune’e nia kontinua ativu iha rede klandestina no kontinua mantein kontatu ho Komandu Luta inklui ho Komandante Taur Matan Ruak iha Lohunu Postu Administrativu Ossu Munisípiu Viqueque.
Depois referendum Manuel Castro envolve aan iha partidu Fretilin hahú 2000-2007 no nia hanesan kordenadór partidu Fretilin iha PostuAdministrativu Venilale 2007-2022 no iha 2012-2017 eleitu hanesan Deputadu hosi bankada Fretilin iha terseiru lejislatura no asume kargu hanesan Vise Prezidente Komisaun E Parlamentu Nasionál trata Infraestrutura.
Iha 6 fulan abríl 2023 matebian hakotu iis iha Hospitál Nasionál Guidu Valadares (HNGV) tanba moras.
Jornlista: Natalino Costa
Editór : Zezito Silva

