PNTL husu partidu polítiku kontribui ba pás iha Baucau
BAUCAU, 12 abríl 2023 (TATOLI) – Komandu Polísia Nasionál Timor-Leste (PNTL), munisípiu Baucau husu ba partidu polítiku inklui organizasaun arte-marsiál hotu atu kontribui ba pás no estabilidade durante períodu kampaña to’o eleisaun parlamentár.
Komandante PNTL munisípiu Baucau, Superintendente Xefe António de Sá, esplika, liuhosi sorumutu entre koordenadór partidu polítiku inklui organizasaun arte-marsiál sira hamosu konkordánsia no sei asina paktu dame hodi hasoru festa demokrasia iha munisípiu Baucau.
“Nu’udar sidadaun Timor tenke konsiente katak rai Baucau ne’e ita hotu nian, ita tenke kontribui no partisipa hodi kria pás no estabilidade tanba mesak raan maluk hotu,” Komandante PNTL Baucau hateten iha Vila Nova, kuarta ne’e.
Komandu PNTL Baucau rejista sujestaun no hato’o agradesimentu ba prezensa partidu polítiku no organizasaun arte-marsiál ne’ebé iha sentidu nasionalismu atu hamutuk ho parte seguransa hodi asegura estabilidade iha Baucau.
Liuhosi kontribuisaun entidade hotu iha ámbitu eleisaun parlamentár tinan-ne’e sei sai referénsia ba munisípiu seluk no barrometru ba nasionál inklui mundu internasionál.
“Ita kontinua nafatin ho maneira K3 katak komunika, kolabora no koordena maibé tenke ho onestidade,” Superintendente Xefe António de Sá akresenta.
António de Sá konsidera dezentendimentu bainhira K3 refere la funsiona ho di’ak nune’e liuhosi sorumutu ne’e hametin liután liña komunikasaun hodi hametin koordenasaun no bele kolabora ba pás no estabilidade iha Baucau.
Koordenadór juventude partidu CNRT Baucau, Eduardo Filipe Ximenes, hateten, prontu kontribui ho PNTL Baucau atu kolabora hamutuk asegura seguransa durante períodu kampaña to’o rezultadu eleisaun parlamentár remata.
“CNRT iha prinsípiu rua hanesan estabilidade nasionál no dezenvolvimentu tanba ne’e ami hakarak hametin nafatin prinsípiu ne’e no komitmetu ba kualkér aktu sei evita atu labele akontese perturbasaun ba orden públiku iha Baucau,” Eduardo Ximenes argumenta.
Nia haktuir, CNRT Baucau tempu badak sei estabelese estrutura komisaun organizadora no sei submete lista naran sesaun seguransa ba PNTL atu hamutuk asegura movimentu militante hosi postu administrativu sira bainhira partisipa iha kampaña eleitorál.
Marka prezensa iha sorumutu refere Diretór CNE, diretór STAE, konsellu veteranu, prezidente KRAM Baucau, autoridade munisípiu Baucau, F-FDTL liuhosi komponente terrestre, reprezentante partidu polítiku, organizasaun arte-marsiál no konviksaun relijioza.
Jornalista : Natalino Belo
Editór : Evaristo Soares Martins
