Falur inaugura postu Polísia Militár iha Baucau
BAUCAU, 13 abríl 2023 (TATOLI) – Xefe Estadu Maiór Jenerál FALINTIL-Forsa Defeza Timor-Leste (F-FDTL), Tenente Jenerál Domingos Raul ‘Falur Rate Laek’, kinta ne’e, inaugura edifísiu ba postu Polísia Militár (PM) iha munisípiu Baucau.
Xefe Estadu Maiór Jenerál F-FDTL), Tenente Jenerál Domingos Raul ‘Falur Rate Laek’, esplika, prezensa iha seremónia refere atu reajusta estrutura ne’ebé la’ós signifika ba de’it situasaun pesoál maibe inklui mos hadi’a infraestrutura.
“Sé ita hanoin atu profesionaliza Polísia Militár hodi kumpre misaun ho di’ak tenke apoia lojístika, maske bele treinu prepara labele kumpre misaun,” Xefe Estadu Maiór Jenerál F-FDTL hateten iha Vila Nova, kinta ne’e.
Jenerál fitun tolu ne’e husu ba membru PM hotu atu utiliza edifísiu foun refere ho domin no kuida hodi kumpre misaun nu’udar kontrolu ba militár sira.
Falur enkoraja Polísia Militár ho inisiativa rasik atu konstrui rasik jardin, fatin ba transporte nune’e iha panorama furak nu’udar fatin edifísiu.
“Ha’u husu labele riska no hatene uza nune’e kleur mak halo manutensaun,” Tenente Jenerál Falur Rate Laek akresenta.
Falur argumenta, bainhira fasilidade kompleta ona, PM tenke kumpre misaun hanesan kontrola membru militár sira ne’ebé fim semana laiha autorizasaun, uza transporte laiha lisansa, uza uniforme laloos, konsumu alkól no estraga komunidade nia festa.
Entretantu, totál orsamentu ne’ebé utiliza ba reabilitasaun edifísiu PM postu Baucau hamutuk $87.064, 30, ne’ebé responsabiliza hosi kompañia enjeñeria F-FDTL, unidade apoia serbisu ho durasaun obra tinan-ida resin.
Jornalista : Natalino Belo
Editór : Evaristo Soares Martins
