Governu lansa atribuisaun fundu dezenvolvimentu millaun $2.5 ba OAM
DILI, 13 abríl 2023 (TATOLI) –Sekretaria Estadu Juventude no Desportu (SEJD) hamutuk ho Komisaun Reguladora Arte Marsiál Institutu Públiku (KRAM.IP) realiza lansamentu ba distribuisaun fundu dezenvolvimentu millaun $2.5 ba Organizasaun Arte Marsiál hamutuk 17 iha Jináziu Dili .
“Governu tenke apoiu makas ba Arte Marsiál sira, labele hatudu liman ba sira maibé Governu tenke iha sira nia kotuk hodi apoiu lori sira ba dalan los, ohin Governu atribui orsamentu ba sira atu dezenvolve di’ak liután atu sai modalidade desportiva ida di’ak liu iha nasaun ne’e”, Abrão dehan iha nia intervensaun iha Jináziu Dili, kinta ne’e.
Nia dehan, fundu ne’e distribui ba OAM sira atu bele responde ba difikuldade ne’ebé durante ne’e hasoru.
“Orsamentu ne’ebé atribui ne’e atu rezolve ba problema no difikuldade hirak ne’ebé sira hasoru oinsa sira atu iha kapasidade kontrola sira nia membru sira, ita apoiu atu organizasaun sira iha treinadór no mestre ne’ebé di’ak liu oinsa atu dezenvolve joven timoroan sai di’ak liután, ida ne’e mak osan ne’e nia objetivu”, Abrão revela.
Governu apoiu OAM ho objetivu ida mós atu iha sekretariadu ida ne’ebé permanente atu tau matan ba membru sira, apoiu atu OAM sira atu bele halo kompetisaun buka fini atleta ne’ebé di’ak hodi kompete iha eventu internasionál sira.
Iha fatin hanesan Prezidente KRAM Fernando Antonio da Costa ‘Lekinawa’, reforsa tan katak serimónia ne’e hanesan istória ida ba OAM hotu.
“Ohin momentu importante ida ba ita hotu, primeira-vez iha nasaun ida ne’e, Governu apoiu ba imi Arte Marsial hotu atu promove imi-nia talentu liuhosi arte, ida ne’e mak importante”, nia relata.
Nia husu ba membru OAM sira hotu atu la’o tuir doutrina ne’ebé iha tanba iha doutrina laran la hanorin membru sira atu oho malu, sunu uma no halo at ema seluk.
“Ha’u aprende arte marsiál sira nia doutrina hotu, laiha jurus ida mak hanorin atu sunu ema nia uma, laiha jurus ida atu kaer rama ambong ba hana malu no seluk tan”, nia afirma.
Iha okaziaun ne’e Prezidente Persaudaraan Setia Hati Terate (PSHT) Baltazar Lemos Seixas agradese ba Governu bele atribui ona orsamentu ba sira atu dezenvolve sira nia organizasaun.
“Ami agradese tanba Governu ida ne’e hanoin di’ak ba arte marsiál sira tanba arte marsiál mós hanesan riku-soin Timor nian liuliu arte marsiál sira ne’ebé rejistu iha notariadu, ami sei ezekuta orsamentu ne’e ho di’ak tuir regulamentu Governu fó ona mai ami”, nia relata.
Orsamentu ne’ebé Governu atribui ba OAM sira PSHT simu hamutuk rihun $339, sei aloka ba harii sede permanente ba PSHT, kria kampionatu nasionál, apoiu administrasaun organizasaun nian no seluk tan.
Orsamentu ne’ebé OAM sira simu sei jere to’o tinan tolu ba leten.
Totál orsamentu ba federasaun no arte marsiál sira hotu hamutuk milaun $2.5.
Fundu ne’e apoia ba Organizasaun OAM hamutuk 17 ne ebé atu asesu ba fundu ne’e mak, hanesan federasaun sira hamahan aan iha Konfederasaun Desportiva Timor-Leste (CDTL-sigla Portugés) kompostu hosi Taekwondo Wushu Boxe Aikido Karate-do, Kempo no seluktan, Federasaun Silat Timor-Leste (FSTL) kompostu hosi Persaudaraan Setia Hati Terate (PSHT). Ikatan Kera Sakti (IKS-PTD). Kmanek Oan Rai Klaran (KORK), Seruling Dewata, Persya Diri no Padjajaran.
Jornalista: Hortencio Sanchez
Editór : Zezito Silva
