DILI, 13 abríl 2023 (TATOLI)-Prokuradór Jerál Repúblika, Alfonso Lopez, informa, prosesu investigasaun ba kazu José Bernardo ne’ebé deskonfia mate iha sela Komandu Polísia Nasionál Timor-Leste (PNTL), Munisípiu Díli tinan kotuk, agora daudaun hosi Ministériu Públiku (MP) finaliza ona prosesu investigasaun no haruka ona ba Tribunál Judisiál Primeira Instánsia atu ajenda ba julgamentu.
“Hanesan foin daudaun Prokuradór Jerál Repúblika promete katak, kazu joven mate iha sela sei finaliza iha fim fulan marsu. Agora sai realidade.Tanba Ministériu Públiku finaliza ona nian prosesu investigasaun no agora haruka ona ba ona iha Tribunál,” Alfonso Lopez, hateten ba jornalista sira iha sentru kulturál Embaxada Portugal, kinta ne’e.
Nia dehan, ba kazu José Bernardo nian, parte MP prepara ona akuzsaun no agora daudaun enkamiña ona ba Tribunál Judisiál Primeira Instánsia atu ajenda ba julgamentu.
“Sim, iha ona akuzasaun, agora parte Ministériu Públiku provisóriu remata ona. Depende orsida Juíz mak sei ajenda ba julgamentu no sei asesu hosi ita-bo’ot sira avontade, a não ser kazu violasaun seksauál mak ita bo’ot sira labele asesu,” PJR Alfonso Lopez adianta.
Jornlista: Natalino Costa
Editór. : Rafael Ximenes de A. Belo
