Lia-na’in sira hamulak husu líder sira hamutuk
DILI, 13 abríl 2023 (TATOLI)–Molok Timor-Leste selebra festa demokrasia iha ámbitu kampaña eleitorál no eleisaun parlamentár, VIII Governu Konstitusionál liuhosi Ministériu Ensinu Superior Siénsia no Kultura (MESSK) no Sekretáriu Estadu Arte no Kultura (SEAK) selebra serimonia rituál hodi husu matak malirin ba líder partidu sira.
Sekretáriu Estadu Arte no Kultura, Teofilo Caldas, hateten agora daudaun ne’e partidu polítiku sira hala’o namanas hela sira-nia konsolidasaun molok tama ba kampaña eleitorál atu ba eleisaun, entaun VIII Governu hakarak realiza serimónia rituál ida ba atu husu hakmatek ba partidu polítiku sira hotu liu-liu unidade iha lider polítiku sira.
“Ita husu ba Maromak Matebian rai-lulik, fatuk-lulik, uma-lulik no natureza timor nian atu fó pás ba Timor liu-liu ba ita-nia lideransa sira atu nafatin iha unidade,” Teofilo Caldas hateten iha resintu knua uma lisan Karketu Leo-Besi, Manleuana, Baialeste, kinta ne’e.
Ne’eduni iha serimónia kultura ritual ne’e, SEAK husu ba lian na’in sira atu ko’alia ka hamulak tuir buat ne’ebé maka loos atu lori benefísiu ba povu nia moris. Maske sira nia hamulak ho lian ne’ebé ema seluk la hatene maibé importante liu maka sira nia hamulak harohan no dadolin hodi husu lideransa sira tenke unidade no rai timor tenke iha pas no povu tenke hetan moris di’ak.
“Ha’u hakarak apela ba ita-boot lia-na’in sira atu servisu makaas liután hodi halo buat hotu tuir ninia regra kultura no tradisaun, no lisan Timor nian atu lori povu Timor ne’e bele moris hakmatek no pás hodi lori ita hotu ba moris iha prospriedade tuir ita hotu, povu hotu no bei-ala sira-nia mehi,” nia dehan.
Objetivu prinsipál ida-ne’e mak la’o duni tuir VIII Governu Konstitusionál ninia hakarak bele dehan katak lia-na’in sira-nian papél atu kontribui ba dezenvolvimentu iha nasaun liu-liu iha setór kultura nian hetan duni prévileziu.
Tanba, esforsu ne’ebé mak sira halo atu harak rai ida-ne’e hetan hakmatek no pás líder sira iha nafatin unidade sai duni realidade.
Jornalista : Tomé Amado
EDitór : Cancio Ximenes
