Membru foun PSHT sei simu graduasaun iha jullu
DILI, 13 abríl 2023 (TATOLI) – Prezidente Persaudaraan Setia Hati Terate (PSHT) Baltazar Lemos Seixas, inform iha fulan jullu nia-laran, membru foun hosi organizasaun PSHT sei gradua, enkuantu treinamentu ba membru sira rutina hela iha teritóriu nasionál.
“Agora ami prepara hela membru foun sira iha fatinfatin, ko’alia ho Governu, ami sei halo graduasaun iha fulan jullu nia-laran, tanba PSHT kada tinan tenke halo graduasaun ba membru foun sira, ida ne’e kultura orgazasaun nian”, Prezidente dehan ba Agência TATOLI iha Jináziu, kinta ne’e.
Nia dehan, totál ba membru foun sira atu tuir graduasaun iha tinan ne’e seidauk hatene númeru ho loloos tanba treinadór sira sei prepara hela lista hafoin submete no publika.
Nia dehan, totál ranting PSHT nian iha Timor-Leste ne’ebé fó hela treinamentu ba membru foun sira hamutuk 90-resin rejista iha Komisaun Reguladora Arte Marsiál Institutu Públiku (KRAM.IP).
Rekorda fali katak iha tinan kotuk 2022 PSHT nia membru foun ne’ebé tuir graduasaun hodi sai membru loloos hamutuk rihun 10-resin.
Jornalista: Hortencio Sanchez
Editór : Zezito Silva
