OJE 2023 : MAP ezekuta ona 10% iha trimestre dahuluk

DILI, 13 abril 2023 (TATOL I)— Ezekusaun Orsamentu Jerál Estadu (OJE) 2023 ba Ministériu Agrikultura no Peska (MAP) iha trimestre dahuluk hahú hosi janeiru to’o marsu ne’e ezekuta ona $2.822,541,19 (10%).

“Tinan ne’e, orsamentu ne’ebé aloka mai MAP hamutuk $28.230,582 no ita konsege ezekuta ona $2.822,541,19 (10%) iha trimestre dahuluk,” Diretora Jerál Servisu Korperativu Ministériu Agrikultura no Peska (MAP), Ervina Soares Pinto dehan ba Agência Tatoli, iha nia knaar-fatin, MAP Comoro, Dili, kinta ne’e.

Nia dehan, hosi $2.822,541,19 (10%) iha trimestre dahuluk ne’e, ba nia obligasaun $1.123,554,75 (4%), komitmentu $4.488,591,88 (16%) no balansu $19.795,849,18 (70,12%).

“Hosi OJE ne’e, ezekusaun atual foin 10%, maibé ita konta hotu ninia komitmentu, no obligasaun sa’e ona 30%. Tanba, ita nia planu atu sosa tratór unidade 35, iha ona prosesu konkursu públiku,” nia dehan.

Nia dehan, dezafiu sira ne’ebé MAP hasoru mak haree ba sistema mudansa oituan iha estrutura orsamentu. Ho ida ne’e mak halo atrazu, maibé difikuldade ne’ebé iha MAP sempre servisu hamutuk ho Ministériu Finansa (MF) hodi buka solusaun.

Jornalista : Arminda Fonseca

Editora     : Armandina Moniz