Prezidente PSHT alerta membru hotu tenke mantein páz iha ElPar
DILI, 13 abríl 2023 (TATOLI) – Prezidente Organizasaun Arte Marsiál (OAM) Persaudaraan Setia Hati Terate (PSHT) Baltazar Lemos Seixas husu ba membru hotu iha teritóriu nasionál atu iha konsiénsia hodi mantein páz no estabilidade iha Eleisaun Parlamentár (ElPar) ne’ebé sei akontese iha 21 maiu tinan ne’e..
“Husu ba membru hotu atu iha konsiénsia atu mantein páz iha nasaun ida ne’e, páz ne’e sai hosi ita ida-idak nia aan rasik hodi kontribui ba ita-nia dezenvolvimentu nasaun, kriasaun ba páz importante iha ámbitu kampaña eleitorál to’o eleisaun no presiza evita duni roblema no labele halo problema tun sa’e”, Baltazar dehan ba Agência TATOLI iha Jináziu Dili, kinta ne’e.
Baltazar husu ba membru hotu atu labele utiliza atributu arte marsiál hodi envolve iha kampaña eleitorál no fatin públiku hodi provoka situasaun.
“Membru sira hotu labele utiliza farda iha fatin públiku, utiliza bainhira fó treinamentu ba alin sira iha ranting, bainhira fó treinamentu hotu sai kedan iha ranting mak fila ba uma, nune’e labele utiliza mós farda iha tempu kampaña, bainhira membru sira la kumpre mak ekipa ida sei halo atuasaun entrega ba Polisia Nasionál Timor-Leste hodi prosesa tuir lei, labele ema individu ida atu estraga organizasaun tomak nia-naran”, nia konklui.
Jornalista: Hortencio Sanchez
Editór : Zezito Silva
