SEAK simu no halo avaliasaun ba proposta uma lulik hamutuk 153
DILI, 13 abríl 2023 (TATOLI)–Diretór Jerál Arte no Kultura, Manuel Smith Ximenes, hateten VIII Governu Konstitusionál kontinua tau nafatin importánsia atu dezenvolve uma lulik iha Timor nu’udar patrimóniu Estadu no patrimóniu kulturál.
Nia hatutan, iha tinan ida-ne’e Sekretáriu Estadu Arte no Kultura kontinua simu proposta uma lulik hamutuk 153 atu bele fó apoiu orsamentu, inklui halo avaliasaun ba proposta no halo verifikasaun fila-fali ba uma lulik sira-ne’e.
“Ita boot sira hatene katak hahú hosi tinan 2021-2022, ita apoiu ona uma lulik iha territóriu nasionál hamutuk 113 no agora iha tinan ida-ne’e ita simu tan proposta hamutuk 153,” Diretór Jerál ne’e hateten ba Agência Tatoli, kinta ne’e.
Tuur nia, prosesu verifikasaun ne’e importante duni tenke halo atu nune’e bele haree direta kondisaun saida mak akontese ba uma lulik sira, atu nune’e bainhira kuandu Governu apoiu orsamentu karik bele ba duni ninia alvu.
“Ita sei tuun fali ba hasoru malu ho lia na’in sira hosi uma lulik 153 ne’e, atu haree atinjimentu ligadu ho proposta ne’ebé mak sira hatama daudaun ne’e, tanba ita labele simu tomak sira-nia proposta atu apoiu tuir sira-nia hakarak,” nia dehan.
Tanba, iha kestaun tolu maka fó dalan ba Ministériu atu fó apoiu ba uma lulik sira-ne’e mak hanesan prosesu inaugurasaun, prosesu konstrusaun no reabilitasaun ho nune’e ekipa tékniku hosi dirasaun nasionál patrimóniu kulturál sei prepara kalendáriu sira atu tun ba halo verifikasaun
Entretantu, orsamentu ne’ebé SEAK prevee ona atu apoiu ba uma lulik 153 ne’e hamutuk rihun $50, tuir nia, fundu ne’e ki’ik maibé atu apoiu uma lulik sira tenke kria uluk rekizitu ida mais rigorozu, atu nune’e bele halo balansu ba apoiu sira atu uma lulik ida iha munisípiu tenke hanesan labele iha ida boot liu fali ida seluk
Jornalista : Tomé Amado
Editór : Cancio Ximenes
