Autoridade munisípiu Dili sei hasai xefe família haat okupa resintu DSEMD
DILI, 14 abríl 2023 (TATOLI)–Diretór Servisu Edukasaun Munisípiu Dili (DSEMD), Carlito da Silva hateten, tersa (18/04) semana oin, sira sei hasoru malu ho xefe família uma kain haat ne’ebé okupa propriedade Ministériu Edukasaun nian atu asina akordu hodi apoiu indemnizasaun ba família sira-ne’e.
“Ita-nia autoridade Munisípiu Dili haruka ona konvite mai atu fasilita mediasaun entre dirasaun edukasaun Dili ho família uma kain haat ne’ebé okupa hela rai Ministériu nian iha Comoro. Se tersa agora ami ko’alia mak konkorda bele asina ona akordu hodi prepara loke sira-nia konta bankária maibé kuandu sira la konkorda prosesu ne’e sei lori ba Ministériu Públiku,” Diretór Carlito hateten ba Agência Tatoli iha edifísiu Edukasaun Dili, Comoro, sesta ne’e.
Hosi família uma kain haat ne’e, iha família ida mak antes ne’e asina ona akordu ho Munisípiu Dili, agora sorumutu iha tersa oin ne’e atu ko’alia tan ho família uma kain tolu seluk atu buka solusaun ba prosesu indemnizasaun.
Bainhira família sira-ne’e tuir duni prosesu normál hodi asina, entaun sei iha prosedimentu balun ne’ebé presiza haree fila-fali hanesan apoiu indemnizasaun ka prepara rai halo uma ba sira hela de’it, ne’e mós sei haree kustu hosi kada uma tanba kuantidade ka folin sei la hanesan.
Maibé, nia dehan, montante hira mak Governu sei prepara ka prevee ba família uma kain haat ne’e sei depende ba prosesu verifikasaun ne’ebé Ministériu obra públiku ho agrikultura mak sei tun direta atu haree, hodi bele halo estimasaun ba kustu sira kada uma inklui ai-horis sira-ne’ebé mak família sira kuda.
Hosi opsaun ne’ebé ma Governu prepara ona iha alternativu rua, rai iha Halidolar Governu preparadu ona ba família uma kain haat ne’e, kuandu sira la konkorda Governu sei apoiu de’it osan ba sira mak buka rai hodi halo uma maibé rua ne’e mak sira la konkorda hotu la’o tuir dalan justisa.
“Se sira mak hili ba dalan justisa ita bele konsidera bele mosu desizaun seluk ne’ebé dala ruma bele hamosu fali buat ne’ebé ita la hakarak. Tanba ne’e, ita-nia família uma kain haat tenke hanoin didi’ak atu tersa ne’e bele la’o tuir sira-nia konsiénsia,” nioa dehan.
Enkuantu xefe família ida-ne’ebé hato’o de’it nia naran inisiál ‘MAU-LEAR’ ne’ebé okupa fasilidade edukasaun Munisípiu Dili heteten, laiha problema kuandu Governu hakarak foti ninia rai tanba sira konsidera ne’e rai Estadu nian, maibé molok hasai sira tenke iha konkordánsia ida atu sira sai mós ho dignu.
“Ba ha’u laiha problema sai ohin ka sai aban hanesan de’it, maibé ami hakarak sai ho dignu. Tanba, ami hein tersa oin ami hakarak rona duni hosi autoridade Dili no dirasaun edukasaun ninia desizaun,” nia dehan.
Jornalista : Tomé Amado
Editór : Cancio Ximenes
