MEJD fó sansaun dixiplinár ba Eskola ESG 12 Novembru Becora
DILI, 14 abríl 2023 (TATOLI)–Diretór Servisu Edukasaun Munisípiu Dili (DSEMD), Carlito da Silva, hateten Ministériu Edukasaun Juventude no Desportu (MEJD) fó sansaun dixiplinár ba estrutura hosi eskola ensinu sekundáriu Jerál (ESG) 12 Novembru Becora, tanba realiza ona ezame primeiru periodu maibé la konsulta ho Diresaun Servisu Edukasaun Munisípiu Dili.
Diretór ne’e hateten Ministériu fó sansaun dixiplinár ba estrutura eskola 12 Novembro tanba sira la obedese ba regra no kalendáriu ezame primeiru períodu ne’ebé loloos ne’e sei lansa iha segunda agora, tanba nu’udar eskola públiku hakarak ka lakohi tenke tuir desizaun Ministériu nian la bele halo tuir ida-idak nia hakarak.
“Ita-nia Ministériu konsidera eskola 12 novembru nu’udar eskola públiku tanba saida mak sira labele kumpre kalendáriu no regra ne’ebé mak fó sai ona hosi Ministériu Edukasaun katak ezame primeiru periodu ba eskola públiku nian sei lansa iha segunda agora,” Diretór Carlito hateten ba Agência Tatoli iha ninia servisu fatin, Comoro, sesta ne’e
Realidade sira hahú ona ezame hamutuk ho eskola privadu no eskola katólika sira no ohin konklui ona sira-nia ezame, tanba ne’e mak Ministériu husu ona dirasaun hotu-hotu tun ba halo ona verifikasaun iha eskola ne’e no fó ona sansaun dixiplinár ba sira tanba saida mak la kumpre desizaun ne’ebé mak Ministériu fó sai ona
Nia konsidera, loos duni antes ne’e mosu problema iha kalendáriu ezame primeiru period, tanba ne’e maka Ministériu hasai duni sirkulár ida ba eskola hotu tantu públiku no privadu sira, katak ezame primeiru períodu sei hahú iha segunda 17 abríl maibé tarde tiha ona tanba eskola privadu no eskola katólika sira hahú tiha ona ezame.
Ho nune’e, Ministériu orienta de’it diretór servisu edukasaun Munisipál sira atu trava de’it mak eskola públiku sira atu ezame hamutuk iha segunda semana ne’e maibé eskola 12 novembru la hatene halo nusa sira mós la’o tuir tiha eskola privadu no eskola katólika sira hodi hahú tiha ona ezame refere. tanba fallansu sira-ne’e mak ministériu deside fó sansaun ba sira
Enkuantu hosi parte Dirasaun servisu edukasaun Dili nian halo mós konfirma ho dirijente sira iha eskola privadu no eskola katólika kona ba matéria ezame ne’ebé sira fó ona ba alunu sira-ne’e kompleta ona ninia kargu de oráriu ka lae, maibé sira garante katak prontu hotu ona no sei la fó impaktu ida ba estudante sira iha matéria primeiru períodu.
Gabinete Apoiu Tékniku (GAT) hosi Eskola Ensinu Sekundáriu Jerál (ESG) 12 Novembru Becora, Kanisius Elu, hateten loloos ne’e tuir alterasaun ne’ebé fó sai hosi Ministériu Edukasaun ba ezame primeiru períodu nian sei hahú iha segunda 17 abríl maibé parte eskola realiza sedu tiha sira ninia ezame ne’e, tanba atu evita konflitu entre alunu 12 Novembru no alunu 05 de Maiu ne’ebé seidauk hetan solusaun.
“Ita trasa tiha ona oráriu ezame hahú hosi loron 10-15 abríl, oráriu ne’e ita submete ona ba dirasaun servisu edukasaun no parte polisia eskuadra Kristu Rei, atu evita situasaun la di’ak entre alunu sira hosi eskola rua ne’e,” nia dehan.
Bainhira alterasaun ne’e Ministériu fó sai, eskola 12 Novembru Becora kria tiha ona ninia oráriu ne’ebé fiksu, ne’eduni parte eskola konsidera la kontra desizaun Ministériu nian maibé hakarak ka lakohi, sira tenke la’o tuir saida mak trasa tiha ona tanba haree ba situasaun no kondisaun iha eskola rua ne’e.
Jornalista : Tomé Amado
Editór : Cancio Ximenes
