Servisu edukasaun Dili identifika profesór mate klamar 17

DILI, 14 abríl 2023 (TATOLI)–Diretór Servisu Edukasaun Munisípiu Dili (DSEMD), Carlito da Silva, hateten ekipa servisu edukasaun halo ona identifika iha profesór voluntáriu na’in-17 mak konsidera hanesan profesór mate klamar tanba profesór sira-ne’e laiha dokumentu no la hateten hanorin iha eskola ne’ebé.

“Profesór 17 ne’e ita bele konsidera mate klamar tanba ami halo ona verifikasaun hetan de’it mak sira-nia naran maibé dokumentu ida mós laiha. Ami haruka ona ekipa ba halo identifikasaun iha eskola sira atu prova katak sira hanorin iha eskola ne’ebé ami la hetan to’o agora,” Diretór Carlito hateten ba Agência Tatoli iha ninia servisu fatin, Comoro, sesta ne’e.

Sira na’in-17 ne’ebé tama iha lista profesór voluntáriu ne’e servisu edukasaun Dili la rekoñese, tanba laiha dokumentu atu hateten sira mai hos nivel edukasaun saida, ne’eduni atu halo nusa mós dirasaun sei la hatama sira iha lista profesór sira-nian.

Tuir nia, foin lalais iha profesór ida mak mai hato’o ninia reklamasaun tanba la liu iha prosesu selesaun, depois nia mai halo protesta mak dirasaun foin identifika nia mós tama iha lista 17 ne’e.

Bainhira dirasaun halo konfirmasaun, nia dehan, momentu ne’ebé nia la tuir prosedimentu normál maibé nia hatama naran liu-hosi diretór ida maibé nia la fó sai diretór ne’e ninia identidade.

Agora reklamasaun ne’ebé mak profesór refere halo ne’e hateten de’it nia hanorin iha eskola maibé nia la klarifika eskola ne’ebé mak nia hanorin. Hosi de’it hahalok sira hanesan ne’e bele identifika ona jogu ne’ebé maka durante la’o iha edukasaun nia laran.

Entretantu, dirasaun haruka ekipa ba halo verifikasaun iha kada eskola sira atu identifika profesór na’in-17 ninia atividade sira, laiha eskola ida mak rejista profesór sira-ne’e nia naran.

“Ami ba halo ona verifikasaun iha eskola sira hotu. Ami buka tuir iha lista profesór sira iha kada eskola depois ami check tan iha kuadru sira mós ami la hetan naran profesór ne’ebé mai hato’o reklamasaun no inklui sira na’in-16 seluk ne’ebé iha hela nakukun laran ne’e,” nia dehan

Profesór na’in-17 ne’ebé naran laiha lista voluntáriu ne’e mai hosi dadus anteriór ne’ebé lahatene mai hosi tinan saida, tanba ne’e dirasaun kontinua hein nafatin bainhira profesór sira-ne’e mai reklama sira-nia direitu, dirasaun sei levanta kazu ne’e atu sira bele deklara sé mak fasilita sira hodi tama iha lista profesór voluntáriu ne’e.

Jornalista : Tomé Amado

Editór        : Cancio Ximenes