DILI, 14 abríl 2023 (TATOLI)-Prezidente Repúblika, José Ramos Horta, husu ona ba FALINTIL-Forsa Defeza Timor Leste (F-FDTL), atu destaka membru F-FDTL iha territóriu nasionál hodi asegura seguransa durante kampaña to’o eleisaun parlamentár 2023.
“Fó instrusaun ba forsa nian preparadu atu partisipa, labele envolve iha atividade polítika, tenke implementa disiplina no militár labele lanu halo fali problema,” Xefe Estadu Maiór Jenerál F-FDTL, Tenente Jenerál, Falur Rate Laek, hateten ba jornalista sira hafoin ramata enkontru ho Xefe Estadu iha Palásiu Prezidensiál, Bairru Pite, sesta ne’e.
Nia esplika, durante enkontru parte rua halo diskusaun atu óinsa envolve instituisaun defeza hodi reforsa seguransa durante kampaña to’o eleisaun lejizlativa ne’e.
“Ko’alia asuntu kona-ba agora ita atu tama ba fulan polítiku, husu para ami haree took kontribuisaun apoiu kona-ba seguransa F-FDTL halo saida ba,” Nia dehan.
Daudaun ne’e, nia dehan simu ona diretiva polítika hosi Ministériu Defeza atu destaka membru F-FDTL ba terrenu hodi reforsa servisu PNTL nian maka atu garante kampaña to’o eleisaun parlamentár iha loron 21 fulan-maiu 2023 la’o ho susesu.
“Hau horse’ik mak foin simu diretiva polítika, ha’u sei ka’er hela iha ne’e, seida’uk estuda depois estuda no le’e tiha mak diretiva polítika mak ha’u halo ha’u nia diretiva komandu para forsa partisipa seguransa ho forma óinsá,” Nia informa.
Kona-ba preparasaun nia relata husi parte F-FDTL oras ne’e, halo ona preparasaun intermuz lojístika hanesan transporta no akomodasaun seluk tan.
Entretantu, kampaña eleitorál sei hahú hosi loron 19 fulan-abríl no ramata iha loron 19 maiu, no eleisaun parlamentár sei hala’o iha loron 21 fulan-maiu 2023. Enkuantu partidu polítiku hamutuk 17 mak sei kompete iha eleisaun parlamentár tinan ne’e.
Jornalista: Nelson de Sousa
Editór: Agapito dos Santos
