Partidu tolu mantein Plataforma hafoin eleisaun lejislativa 2023

DILI, 15 abríl 2023 (TATOLI) – Partidu Frente Revolusionáriu Timor-Leste Independente (FRETILIN), Partidu Libertasaun Popular (PLP) no Partidu Kmanek Haburas Unidade Nasionál Timoroan (KHUNTO) deklara kontinua hamutuk hafoin eleiaun parlamentár tinan ne’e.
Plataforma ne’e selebra hosi lideransa másimu partidu tolu kompostu hosi Sekretáriu Jerál Partidu Fretilin, Mari Alkatiri, Prezidente Partidu Libertasaun Polular (PLP), Taur Matan Ruak no Partidu Kmanek Haburas Unidade Nasional Timoroan (KHUNTO), José dos Santos Naimori Bukar iha Tower Fatuhadu, sabadu, ohin.
Hafoin asina plataforma entedimentu, Kordenadór ba Plataforma mak Mari Alkatiri no nia esplika katak ojetivu hosi asina akordu ne’e atu haforsa relasaun partidu tolu nian hodi kontinua lao hamutuk hafoin eleisaun parlamentár tinan ne’e.
“Ha’u dehan katak servisu partidu tolu ne’e, kuaze tinan tolu, halo partidu tolu ne’e iha koñesementu mútua di’ak liután dúke sira seluk tanba halo sevisu di’ak tebes, la’os de’it ezekuta programa Fretilin nian, maibé tau interese hotu ba programa ne’ebé iha ona antes ne’e, entaun eleisaun ida ne’e no depois eleisaun partidu tolu hakarak kontinua la’o hamutuk”, Sekretáriu Jerál Mari Alkatiri.
Alkatiri hateten, konteúdu hosi plataforma ne’e seidauk define komposizaun ruma maibé koalia de’it kona-ba kreatividade no inovasaun polítika ba futuru, kuandu partidu tolu ka’er Governu.
“Iha plataforma ida ne’e ami seidauk koalia komposizaun, sé mak atu sai Primeiru-Ministru atu sai membru Governu, ida ne’e seidauk no ida ne’e sedu demais ita atu koalia ida ne’e, agora manan eleisaun mak partidu tolu sei tur hamutuk hodi koalia kona-ba ida ne’e”, nia adianta.
Nia haktuir, plataforma ne’ebé mak asina fó dalan ba partidu tolu atu idak-idak aprezenta nia programa prioridade maibé kuandu koalia ona progresu VIII Governu, partidu tolu nia lideransa no nia ema iha obrigasaun koalia saida maka Governu ne’e alkansaa ona.
Iha biban ne’e, Alkatiri husu ba membru tomak atu servisu makas hodi garantia ba vitória iha eleisaun 2023 atu partidu tolu bele forma VIIII Governu.
Hatan kona-ba karik partidu tolu ne’ebe iha plataforma la manan iha eleisaun parlamentar 2023, Mari Alkatiri hateten, ne’e depende ba rezultadu eleisaun mak foin hatene atu ba oinsa ne’e depende vontade povu nian, atu fo fiar ba partidu ida ne’ebé iha eleisaun tinan ida ne’e.
Iha fatin hanesan, Prezidente PLP, Taur Matan Ruak, promete sei mantein plataforma ida ne’e no fiar katak sei manan iha eleisun lejislativa tinan ne’e.
“Tanba hahú iha 2020 mai ohin, Governu konsege halo buat di’ak hodi fó benefísiu ba povu”, nia relembra.
Taur realsa, Governu daualu ne’ebé kaer hosi platafoma partidu tolu konsege halo rekooperasaun ekonómia hafoin Timr-Leste hasoru krize pandemia Covid-19.
“Karik ba oin mak plataforma ida ne’e manan eleisaun mak bao in ita lori Timor-Leste tama ASEAN no halo politíka diverifikasaun ekonómia Timor-Leste iha nivél rejionál”, nia adianta.
Nune’e mós, Lider Supremu KHUNTO José dos Santos Naimori Bukar, hateten KHUNTO sei la sai hosi plataforma ida ne’e.
“Lae ami sei la sai plataforma ne’e, husik ba buat sira ne’e akontese uluk ne’e, ida ne’e esperiénsia ida ba ita no ita rai ba istória, agora ba oin ne’e, haree ba povu nia moris”, nia konklui.
Jornalista: Natalino da Costa
Editór : Zezito Silva

