SLB kandidatu forte ba kampiaun LFTL primeira divizaun
DILI, 15 abríl 2023 (TATOLI) – Ekipa SLB Laulara ho naran estimadu “Makikit Laulara” susesu iha nia jornada da-hitu hodi manán adversáriu AS Ponta Leste ho eskor mihis 1-0 no lori kedan ekipa kandidatu forte ba kampiaun Liga Futeból Timor-Leste (LFTL) iha époka ne’e.
Jogu ba ekipa rua hanesan jogu kontinuasaun LFTL époka 2022-2023 hala’o iha Estádiu Munisipál Dili sabadu loraik ne’e.
Hanesan baibain jogu hahú ekipa rua lansa kedan kontra no atake ba malu tuir tékniku no abilidade ekipa ida-idak nian hodi buka hatama golu.
SLB halo esforsu ne’ebé makas tebes iha kampu laran atu manán nune’e bele fó biban ba sira bele kampiaun duni iha époka ne’e.
Ponta Leste mós ho ambisaun makas atu buka manán hodi bele impede netik SLB labele kampiaun.
Ho nune’e, ekipa rua lansa kontra no atake ba malu ho velosidade ne’ebé makas maibé forsa entre ekipa rua nunka dook malu kuaze hanesan ho menutu primeira parte termina klube rua obrigadu tenke fahe pontu ba malu ho rezultadu provizóriu 0-0.
Hakur ba segunda parte ekipa rua nafatin mantein iha pozisaun ida-idak nian atu bele prodúz golu hodi bele fó vitória ba ekipa ida-idak.
Ponta Leste lansa kontra no atake ne’ebé makas maibé kontra no atake hirak ne’e hela de’it hanesan kontra no atake tanba nunka prodúz golu ruma.
SLB halo esforsu ho kalma no la ansi halo golu maibé iha ambisaun makas atu hatama golu. Ambisaun ne’ebé SLB iha la hela de’it hanesan ambisaun tanba iha menutu 80 bola barullu iha liña oin Ponta Leste nian jogadór Mouzinho de Lima utiliza kedan oportunidade hodi lansa kedan golu ida muda rezultadu ba 1-0.
Hosi golu ne’e mak termina jogu ba ekipa rua tanba to’o menutu 90 termina laiha tan golu ruma mak akontese ba ekipa rua ho nune’e SLB save metin pontu tolu no Ponta Leste obrigadu hela ho derota pontu zero.
Atu informa mós katak, SLB dadaun ne’e iha ona jona aman ba kampiaun nian maski nia sei hein jogu rua abang entre Assalam FC kontra Karketu Dili FC bainhira Karketu manán mak fó risku ba SLB atu halo servisu makas iha jogu ikus kontra Karketu bainhira lakon ho Karketu mak SLB sei falla atu sai kampiaun.
Bainhira aban kontra malu entre ekipa jugante rua ne’e mak empata ou Karketu lakon mak fó oportunidade kedan ba SLB sai kampiaun iha époka ne’e.
Tanba ne’e kampiaun ou la kampiaun SLB nia destinu sei termina hosi jogu entre ekipa Assalam Vs Karketu ne’ebé sei hala’o iha Estádiu Munisipál Dili aban loraik tuku 16:00 otl to’o remata.
Skuad SLB:
Andrew Mensah (13), Bakayoko Ozi (2), Filipe Oliveira (24), Gumario Morreira (5), Jermias Baptista (69), Jhon Frith (6), Michele Hutabarat (26), Cristovão Fernandes (23), Cornelis Portela (11), Zenivio Mota (7), Mouzinho de Lima.
Suplente:
Filonito Nougueira (12), Tomas Sarmento (4), Alexandro Kefi (21), Natalino da Costa (8), Fernando de Carvalho, Domingos Ribeiro (22), Alexandro Lemos (9), Norberto Gonçalves (14), Vabio Pires (28), José Pinto (27), Marques de Carvalho (29).
Treinadór: Julião Monteiro
Eskuad Ponta Leste:
Pablo de Jesus (1), Amerito da Silva (13), Candido de Oliveira (77), Jaimito Soares (4), João Hale (20), Anizio Coreira (14), Revelino Martins (22), Samuel da Cruz (17), José Pereira (29), Luis Ribeiro (7), Expedito da Conseição (10).
Suplente:
Albino Ximenes (95), Jordão da Silva (5), Ejivanio da Costa (11), Jacisto Soares (24), Marito dos Santos (9), Silveiro Garcia (27), Isaac Toni (19), Lazario Ximenes (15), Francisco Costa (8).
Treinadór: Edi Fernandes
Jogu ne’e dirije hosi árbitru prinsipál Pedro Carvalho, juiz liña Filomeno da Silva, Ivo Moniz no árbitru rezerva Francisco Pereira.
Tabela klasifikasaun provijoriu LFTL primeira divizaun
- AD SLB Laulara ho pontu 17
- Emmanuel FC ho pontu 12
- AS Ponta Leste ho pontu 10
- Karketu ho pontu 9
- Atletico Ultramar ho pontu 8
- Assalam FC ho pontu 8
- FC Porto Taibessi ho pontu 8
- Academica FC ho pontu 5
- Aitana FC ho pontu 4
Jornalista: Hortencio Sanchez
Editór : Zezito Silva
