Taur husu Movimentu Fraternidade Populár konsolida hodi kontribui ba dezenvolvimentu

DILI, 15 abríl 2023 (TATOLI) – Prezidente Partidu Libertasaun Populár (PLP) Taur Matan Ruak husu ba Movimentu Fraternidade Populár (MFP) hodi konsolida forsa hamutuk atu kontribui ba dezenvolvimentu Timor-Leste.
Taur hato’o lia hirak bainhira partisipa iha konferénsia nasionál dahuluk ne’ebé MFP iha salaun São José Katedral Dili, sabadu ne’e.
Tuir Matan Ruak katak MFP la’os hambrik de’it hanesan organizasaun partidaria maibé oinsá atu ba future bele sai parseiru ba Governu hodi konstribui ba dezenvolvimentu Timor-Leste.
“Saida maka ha’u hakarak ke aban bainrua ita bo’ot sira nafatin halo mak kontinua nafatin husu ba ita bo’ot sira liuhosi konfrensia ida ne’e mak konsolida forsa no kbi’it ida ne’e hodi ita uza ba dezenvolvimentu nasaun ida ne’e”, nia dehan.
Lider partidu PLP ne’e mós propoin buat tolu ba MFP atu halo iha future mak kria fundu MFP ne’ebé bolu fundu MFP.
“Dezenvolve ekonómia nasaun nia liuhosi buat sira hanesan ne’e. Ha’u hakarak ita bo’ot sira halo hanesan ne’e kada ema ida fulan ida $20 to’o tinan sanulu ita bele halo buat ruma”, antigun gerilleiru refere.
Kestaun daruak mak Taur Matan Ruak husu ba MFP atu kontribu mak programa kuda ai-oan tanba hodi kombate degradasaun kilmátiku iha Timor-Leste.
No ikus liu mak nia husu ba MFP atu hametin kombate problema inseguransa aihan ne’ebé Timor-Leste enfreta, tanba tuir dadus seguransa ai-han iha TL ne’e 36%.
“Ita bo’ot sira kosolida forsa hodi servisu hamutuk ho Governu hodi halo to’os iha rai 20 hektares ka 30 Governu mak fó apoiu atu buat ne’ebé mak ita bo’ot sira iha bele faan ita-nia populasaun sira bele atu imi mós hetan osan hodi hadia imi-nia moris ida ne’e mak importante”, nia subliña.
Iha fatin hanesan, Prezidente MFP, Januario Barboja, hateten MFP moris ho nia prinsípiu ida katak hakarak lori Partidu Libertasaun Populár (PLP) atu kompete iha eleisaun ho kadeira ne’ebé barak liután.
Tanba iha diskursu antes ne’e, Prezidente PLP Taur Matan Ruak hakarak PLP sai partidu daruak ne’ebé manan iha eleisaun.
“Tanba ne’e Movimentu Fraternudade Populár ho ninia ezisténsia ne’e kompromete sei servisu maka hodi lori vitória ba PLP iha eleisaun parlamentár tinan ne’e”, nia adianta.
Jornalista: Natalino da Costa
Editór : Zezito Silva

