Governu apresia setór privadu kria festivál kulturál iha Baucau
BAUCAU, 17 abríl 2023 (TATOLI) – Governu liuhosi Ministériu Tursimu, Komérsiu no Indústria (MTKI) apresia setór privadu tanba inísia ona realiza eventu festivál kulturál hodi komemora loron-moris munisípiu Baucau.
Ministru Tursimu, Komérsiu no Indústria, José Lucas do Carmo da Silva, hato’o parabéns no ksolok wain tebes ba Baucau oan sira hotu iha Timor-Leste no iha diáspora liuhosi eventu ne’e bele hamutuk tau neon, fiar no kbiit koletiva halo planu dezenvolvimentu integradu iha aspetu sosiál, ekonómiku hanesan planu ordenamentu territóriu Baucau nian no hatuur munisípiu Baucau nu’udar destinasaun turístika, sidade turístika moderna, inkluziva, sustentável no responsável.
“Iha momentu istóriku ida-nee ba Baucau no timoroan tomak, ita hotu agradese tanba la’ós de’it koinsidénsia maibé ne’e providénsia grasa Nai Maromak nian, iha komemorasaun loron fundasaun Baucau nian ne’e, akontese mós fenomena natureza totál solar eklipse ne’ebé úniku iha mundu no atrai tebes turista, sientista ne’ebé maihosi kontinente lima,” Ministru Turismu, Komérisu no Indústria hateten iha Vila Antiga, segunda ne’e.
Governante ne’e, salienta, eventu refere ukun nain no reinu sira iha tempu uluk hamutuk harii Baucau iha loron-20 fulan-abríl tinan-1859 no jerasaun atuál sei selebra loron aniversáriu ba dala-164 iha loron 20 abríl 2023 mai ne’e.
Governu hakarak apresia inisiativa setór privadu ne’ebé iha inisiativa rasik hodi halo feira Baucau ne’ebé nakonu ho monumentál no istóriku tebes relasiona ho sidade Baucau nia aniversária natalísia ne’ebé monu ho loron hanesan akontese fenomena natureza totál solár eklipse iha tinan 2023 ne’e.
Haree hosi perspetiva turismu, eventu rua refere nu’udar atrasaun turístika natureza, istórika, kulturál ne’ebé dada ema-barak nia atensaun no atrai vizitante hodi haree, estuda no esperimenta rasik situasaun fanómena ne’e.
Hosi perspetiva ekonomia turismu, iha atividade oferta hosi komunidade no autoridae lokál, asosiasaun otelária, restaurante no bar iha Baucau no atividade prokura maihosi komunidade turista sira-ne’ebé iha ona, no sira-ne’ebé posibilidade sei mai.
“Husu ba setór privadu Baucau no Timor-Leste atu uza momentu istóriku ida-nee, bele tau neon hamutuk hodi dezenvolve turismu ida inkluzivu, sustentável no responsável,” José do Carmo akresenta.
VIII Governu Konstitusionál liuhosi MTKI aprova ona planu estratéjiku nasionál dezenvolvimentu turismu tinan 2023-2030 ho vizaun atu dezenvolve Timor-Leste nu’udar destinu úniku iha Ázia, ho misaun mak hosi polítika ba asaun, ne’ebé sei koordena hosi Autoridade Turismu Timor-Leste ne’ebé sei estabelese iha tempo besik.
Objetivu estabelese autoridade turismu hodi halao dezenvolvimentu turismu nu’udar sistema makro-ekonómiku, implementa polítika nasionál turismu, rugulamentu no prosedimentu legál kona-bá baze atividades turístika, fundu turismu, prosedimentu lisensiamentu setoriál ba atividade turístika.
Polítika nasionál turismu aposta iha tema lima hanaran P5 katak turismu nu’udar prioridade, lori prosperiedade, halo parseria ho parseiru sira, hodi proteje rekursu turístiku, rezidente, turista no ambiente no povu nu’udar sentru ba dezenvolvimentu.
Notísia relevante: CCI-TL realiza festivál kulturál selebra loron moris munisípiu Baucau
Jornalista : Natalino Belo
Editór : Evaristo Soares Martins
