Guarda ESG Hera taka odamatan ba profesór-estudante sira partisipa ezame
DILI, 17 abríl 2023 (TATOLI)–Diretór Eskola Ensinu Sekundáriu Jerál Hera (ESG) António Pinto relata katak guarda na’in-rua iha eskola ensinu sekundáriu jerál (ESG) Hera, ohin halo asaun protesta hodi taka odamatan ba profesór no estudante sira atu labele partisipa ezame primeiru periodu tanba sira seidauk asina kontratu.
“Ohin, ami-nia guarda na’in-rua taka metin odamatan ba ami atu labele realiza atividade ezame primeiru periodu tanba sira na’in-rua seidauk asina kontratu,” António Pinto hateten ba Agência Tatoli iha Edifísiu MEJD Vila Verde, segunda ne’e.
Guarda na’in-rua ne’e hetan kontratu ita 2017 no kada tinan sempre renova maibé ba dezembru 2022 to’o ohin loron ne’e halo ona fulan haat, sira seidauk hetan fali kontratu foun, tanba ne’e mak guarda na’in-rua ne’e halo asaun hodi taka odamatan ba dirijente eskola, profesór no estudante sira atu labele tuir ezame.
“Ita-nia guarda na’in-rua ne’e servisu kuaze tinan neen (6) ona, hahú hosi 2017 to’o agora maibé fulan haat ona, iha abríl 2023 ne’e mak sira seidauk asina kontratu entaun ida-ne’e mak sira la kontente hodi halo asaun ne’e,” nia haktuir.
Diretór ne’e relata katak, nia halo ona aproximasaun ho guarda na’in-rua ne’e no ikus mai sira konkorda hodi loke hikas fali odamatan ba profesór no alunu sira atu tuir ezame, maibé ho razaun sira husu ba dirijente eskola atu halo konfirmasaun ho Diretór Jerál edukasaun Ensinu iha Ministériu Edukasaun Juventude no Desportu atu rezolve asuntu ne’e.
Entretantu dirijente ESG Hera mós simu ona rekomendasaun hosi guarda na’in-rua ne’e no nia rasik konfirma ona ho parte Ministériu maibé dirasaun edukasaun ensinu no iha tempu besik sei prosesa kontratu ba guarda na’in-rua ne’e, tanba Diretór Jerál edukasaun ensinu, Luis da Costa Fernandes, iha hela Munisípiu bainhira fila-fali mai mak prosesu sira-nia kontratu.
Jornalista : Tomé Amado
Editór : Cancio Ximenes
