MS-KFP fó tomada posse ba membru Konsellu Diretivu INSP-TL

DILI, 17 abríl 2023 (TATOLI) – Ministériu Saúde hamutuk ho Komisaun Funsaun Públika (KFP) fó tomada posse ba membru Konsellu Diretivu Institutu Nasionál Saúde Públika Timor-Leste (NSP-TL) atu haforsa kapasidade institutu públiku ne’ebé haree ba kestaun vijilánsia epidemiolójika no vijilánsia sanitária nian.

“Ha’u hakarak agradese Merita Monteiro sai hanesan prezidente Konsellu Diretivu ba INSP-TL,  Lourenço Camnanhas no  Ismael Barreto sai hanesan vogál ba INSP-TL nian tanba durante ne’e ita boot sira aseita no ami-nia pedidu katak atu sai Prezidente no Vogál ba Konselhu Diretivu INSP-TL nian durante tinan haat”, Ministra Saúde Odete Maria Freitas Belo, dehan iha nia diskursu bainhira remata serimónia posse ba membru INSP-TL iha salaun MS Caicoli, ohin.

Nia rekorda, planu atu harii INSP-TL hosi programa Kintu, sestu no sétimu Guvernu Konstitusionál, maibé hanesan Ministra Saúde sente orgulhu tebes tanba hamutuk ho ekipa tomak Ministériu Saúde no eis-titulár sira ne’ebé enevolve iha prosesu ida ne’e, konsege avansa ho inisiativa importante ida ne’e.

Esperiénsia ho Covid-19 sai nu’udar fatór determinante ba nasaun balun atu haforsa kapasidade sira iha instituisaun públika ne’ebé haree ba kestaun vijiánsia epidemiolójika, vijilánsia sanitária no investigasaun sientífika, hahú ho prosesu preparativu ba planu asaun anuál no OGE 2024, aleinde ne’e define mós estratéjia dezenvolvimentu ba médiu-prazu nian.

“Ha’u apela ba diretór sira husi Institutu Nasionál Saúde (INS), Laboratóriu Nasionál Saúde (LabNas) , Diresaun Nasionál Saúde Públika no Diresaun Nasionál Kontrolu Moras atu mantein  funsionamentu normál servisu no husu orientasaun husi Prezidente Konsellu Diretivu INSP-TL kona-ba atividade ne’ebé ita planeia ba oin nian”, nia adianta.

Iha fatin hanesan, Prezidente Komisaun Funsaun Públika Faustino Cardoso, husu ba Institutu Nasionál Saúde Públika Timor Leste (INSP-TL) atu servisu ho efikasia no efisiénsia iha prestasaun servisu tuir mandatu husi instituisaun durante tinan haat nia-laran.

“Ha’u husu ba emposadu na’in tolu, hanesan Prezidente no vogál ba konsellu Diretivu Institutu Nasionál Saúde Públika Timor Leste  (INSP-TL) atu servisu ho efikasia no efisiénsia iha prestasaun servisu nian durante iha ita bo’ot sira nia mandatu ne’e”, nia revela.

Nune’e Prezidente Konsellu Diretivu Institutu Nasionál   Saúde Públika  iha Timor Leste (INSP-TL) Merita Antonio Armindo Monteiro, agradese ba fiar ne’ebé depózita atu lidera no operasionaliza Intituto Nasionál de Saúde Públika Timor-Leste ne’ebé  estabelese ona fulan  tolu liu ba.

“Ida ne’e onra no previléjiu bo’ot atu servisu hamutuk ho ita bo’ot sira hotu hodi funsionaliza INSP-TL no sai parte importante husi esforsu ka prosesu atu fortalese sistema saúde ne’ebé  reziliente sira hanesan pandemia Covid-19 ka ameasa sira husi mudansa klimátika ne’ebé  ita hasoru daudaun”, Merita Monteiro relata.

Tuir Dekretu Lei no.84/2022, 23 novembru sobre kriasaun INSP-TL katak Institutu Nasionál Saúde Públika Timor-Leste (INSP- TL) iha responsabilidade atu monitoriza, avalia no halo análize kona-ba Estadu ka situasaun jerál saúde. Halo vijilánsia epidemiolójika no sanitária, investigasaun sientífika no kontrolu risku sira ne’ebé fó ameasa ba saúde públika.Nune’e iha misaun ida mós atu garante dezenvolvimentu no formasaun ba rekursu umanu, peskiza no mós inkorpora teknolójia iha saúde públika nian.

Jornalista : Felicidade Ximenes

Editór : Zezito Silva