STAE fahe informasaun kona-bá papél parseiru eleisaun iha Baucau
BAUCAU, 17 abríl 2023 (TATOLI) – Sekretariadu Tékniku Administrasaun Eleitorál (STAE), segunda ne’e, fahe informasaun kona-bá papél parseiru iha eleisaun parlamentár iha munisípiu Baucau.
Diretór STAE Munisípiu Baucau, Natividade Freitas, esplika, objetivu sorumutu refere mak fahe informasaun kona-bá lala’ok prosesu eleisaun parlamentár hanesan preprasaun, distribusaun matérial sensitivu no la’ós-sensitivu hosi nasionál, pakotemente, distribusaun matéria ba sentru votasaun, eleisaun to’o apuramentu nivél munisipál.
“Prezensa iha-ne’e atu fó hanoin ba malu oinsá bele la’o hamutuk ho di’ak, liuliu dalaruma mosu dezintendimentu tanba ladún hatene kona-bá papél no kna’ar iha eleisaun parlamentár,” Diretór STAE Baucau hateten iha Vila Nova, Baucau.
Parseiru importante sira-ne’ebé hetan informasaun hosi STAE Baucau mak hanesan fisikál partidu polítiku, observadór eleisaun no jornalista destakadu iha munisípiu Baucau.
Parseiru hirak-ne’e hanesan fiskál partidu polítiku sei hala’o kna’ar fiskaliza lala’ok eleisaun, observadór sei observa no mídia divulga informasaun hotu kona-bá eleisaun hahú hosi preparasaun to’o apuramentu munisipál.
“STAE nu’udar órgaun independente no servisu demokrasiamente katak iha livre ba ema hotu atu espresa iha loron eleisaun ho moto imparsialidade, neutralidade no transparánsia,” Natividade Freitas akresenta.
STAE Baucau kompromete sei transparánsia hahú hosi transportasaun materiál hosi nasionál, pakotementu, transporte materiál ba sentru votasaun to’o apuramentu munisípiu remata.
Nune’e STAE kontinua disponibiliza ba parseiru sira atu kolabora liuhosi iha kartaun kredensiál hodi asesu ba informasuan, dadus inklui lala’ok eleisaun parlamentár tinan ne’e hodi garante transparánsia festa demokrasia to’o hetan susesu iha munisípiu Baucau.
STAE utiliza métodu kontajen votu hanaran D’hondt katak partidu polítiku sira-ne’ebé hetan asentu parlamentár tenke iha pursentu 4 tuir lei númeru 9/2016 fulan-maiu artigu 13 pontu 2 ho jurus kontajen hanesan votu válidu.
Jornalista : Natalino Belo
Editór : Evaristo Soares Martins
