Top

PNTL detein ona suspeitu komete kazu omisídiu iha Ainaro

Portavós Komandu PNTL, Superintendente Xefe Polísia, Arnaldo Araújo. Imajen Tatoli/Francisco Sony

DILI, 18 abríl 2023 (TATOLI) – Portavós Komandu Jerál Polísia Nasionál Timor-Leste (PNTL),  Superintendente Xefe Polísia Arnaldo Araujo, informa PNTL Ainaro detein ona suspeitu ida ho inisial JCC ne’ebé envolve iha kazu omisídiu ne’ebé mak akontese iha Aldeia, Coiloco, Suku Nunomoge, Postu Administrativu  Hatu-Builico, Munisipiu Ainaro.

Kazu ne’e akontese iha segunda (17/4) iha tuku 4:00 madrugada. Motivu hosi kazu ne’e ne’e katak supeitu JCC tama iha uma lisan ida Berdato tenta naok sasan lulik iha uma lisan Berdato nian-laran, maibé vítima sira mós ho hakfodak hader mai, esforsa aan oinsá atu suspeitu labele foti sasán lulik sira ne’e. nune’e ikus mai suspeitu lori katana ta’a vítima sira.

Iha akontesimentu ne’e rezulta vítima na’in-haat, nain rua mate fatin, ida konsege evakua ba óspital maibé la salva nia vida no ida seluk labarik ki’ik halo hela tratamentu iha Hospitál Nasionál Guidu Valadares (HNGV).

“Suspeitu ho naran inisiál JCC mak oho vítima sira nain tolu no hosi vítima hirak ne’e rua mate kedan iha fatin kontesimentu, ida mak mate iha dalan kuandu lori ba óspitál no iha vítima ida mak agora daudaun halo hela tratamentu iha HNGV”, Superintendente Xefe Polísia, Arnaldo Araujo, hateten ba jornalista iha Kuartel Jerál PNTL, Caicoli tersa ne’e.

Nia informa, vítima ne’ebé mate ho naran Maubuti ho idade 65, Ana de Oliveira ho idade 43 no Celestino Xavier idade 26, enkuantu Luciano de Araújo, tinan 3 hetan kanek no evakua ona ba Ospitál Nasionál hodi hetan tratamentu.

Tuir Arnaldo, suspeitu hela dook hosi fatin akontesimentu, suspeitu mós iha relasaun família ho vítima sira.

Tanba ne’e, família no viziñu sira kontata no informa situasaun ne’e bá Komandu PNTL Munisipiu Ainaro, husu atu to’o iha terrenu, hodi halo atuasaun hodi bele ka’er suspeitu ne’e”, Komandante Arnaldo relata.

Ho nune’e, la-kleur de’it Polísia mós to’o iha fatin insidente, hamutuk ho família viziñu sira, bolu suspeitu to’o dalabarak, mais infelizmente, suspeitu lakohi sai.

Tanba ne’e, polísia sira deside sobu de’it odamatan ne’e, tama bá hodi bele kaer suspeitu. Ka’er suspeitu sai mai liur no evakua kedas mai iha PNTL Munisipiu Ainaro.

“No oras ne’e daudauk, Komandu PNTL Ainaro sei halo hela prosesu investigasaun atu bele hatene klean liután, tanba sá maka, nia oho ema sira ne’e”, Arnaldo afima.

Hatan kona-ba suspeitu moras mental, Portavós Komandu Jerál PNTL ne’e hateten, PNTL sei halo hela investigasaun depois investigasaun mak sei hatudu prova katak nia ne’e moras mentál ka lae.

Jornalista: Natalino da Costa

Editór : Zezito Silva

Publisidade

Leave a Reply

Latest Post

error: Content is protected !!