SEJD-FFTL konklui akordu dezenvolve Estádiu Dili

DILI, 18 abríl 2023 (TATOLI) – Sekretáriu Estadu Juventude no Desportu (SEJD) Abrão Saldanha, informa prosesu akordu entre Governu no Federasaun Futeból Timor-Leste (FFTL) daudaun ne’e finaliza ona no hein implementasaun ba rekonstrusaun Estádiu Díli.

“Akordu atu dezenvolve Estádiu ne’e finaliza ona, iha akordu ne’e ko’alia FFTL bele tau osan fundu hosi Asian Football Confederation (AFC) no Federation International Football Assosiation (FIFA) atu rekonstrusaun ba Estádiu ne’e, ne’ebé ita hein de’it iha tempu besik”, Abrão ba Agência TATOLI foin lalais ne’e.

Iha tempu besik mós Governu sei transfere direta jestaun no utilizasaun ba ekipa ida ne’ebé Governu no FFTL sei nomeia atu tau matan ba Estádiu ne’e to’o finaliza.

“Ita-nia hanoin ba utilizasaun no jestaun ne’e ba to’o tinan 20 entrega ba FFTL no FIFA hodi jere ne’e, FFTL no FIFA rasik konkorda ona, ida ne’e nia di’ak ba Governu mak hatun kustu manutensaun, tanba kustu manutensaun no jestaun ita haruka hotu ba sira mak responsabiliza”, governante ne’e esplika.

Dadaun ne’e, ekipa ida hosi AFC no FIFA halo namanas hela levantamentu dadus no dezeñu ba Estádiu ne’e no sei aprezenta fali ba Governu atu haree hafoin bele hahú konstrusaun.

Iha akordu ne’ebé parte tolu konkorda hamutuk mós regula bainhira Estádiu ne’e finaliza iha ona rendimentu tenke selu ona taxa balu ba Estadu kada fulan ou kada tinan haree ba rendimentu tanba kustu no manutensaun responsabiliza hosi FIFA no AFC.

“Akordu regula kedan kona-ba bainhira iha ona rendimentu tenke selu taxa ba Estadu, pursentu hira mak tenke selu ne’e seidauk bele publika sai tanba iha hela negosiasaun”, nia hakotu.

Jornalista: Hortencio Sanchez

Editór : Zezito Silva