Plenária CNE deside partidu Fretilin tenke ajusta fali data kampaña ikus

MANATUTO, 19 abríl 2023 (TATOLI)—Prezidente Komisaun Nasionál Eleisaun (CNE), José Agostinho da Costa Belo, hateten desizaun plenária CNE deside partidu Fretilin tenke ajusta fali data ba kampaña loron ikus nian iha 08 maiu 2023 tanba data hanesan ho partidu CNRT.
Notísia Relevante: Kampaña eleitorál ba Eleisaun Parlamentár sei hahú iha 19 abríl
“Kalendáriu kampaña ba loron ikus nian, partidu Fretilin sei ajusta fali tanba nia ho partidu CNRT ho data hanesan de’it no ita halo ona reuniaun entre partidu maibé na’in-rua laiha konkordánsia hodi troka data, nune’e ami CNE deside plenária katak fó fatin ne’e ba partidu ne’ebé hatama uluk. Entaun CNRT mak kontinua iha Tasi-Tolu,” nia hateten ba Agência Tatoli liuhosi telefónika, kuarta ne’e.
Nia hateten, partidu rua sei labele halo iha fatin ida no oras ne’ebé hanesan, ezemplu partidu Fretilin no CNRT nian ne’ebé hotu-hotu hili Tasi-Tolu sai fatin ikus ba kampaña eleitorál.
“Ami fó opsaun rua mak partidu Fretilin hili loron entre 15 ou 16 maiu, sira tenke hili ida. Hanesan mós partidu PLP mós momentu ne’ebá hili Tasi-Tolu maibé nia hatama ikus liu CNRT ho Fretilin, entaun sira mós fali ona ba loron 17 maiu. Ho data ne’ebé hanesan, presiza partidu polítika nia kompreensaun, nune’e iha kampaña ne’e bele kontribui buat ne’ebé di’ak,” nia hateten.
Prezidente CNE hateten, to’o agora CNE seidauk simu kalendáriu mudansa hosi partidu polítika sira no kalendáriu laiha mudansa, tanba bainhira partidu polítika hakarak halo mudansa tenke relata loron lima antes tama kampaña.
Jornalista : Osória Marques
Editór : Cancio Ximenes

