DILI, 21 abríl 2023 (TATOLI) – Eskola Bázika Filiál (EBF) Tuana-Laran kontinua hasoru difikuldade ba falta sala de aula, nune’e eskola ne’e jere prosesu ensinu aprendizajen ba alunu sira atubele partisipa aula ho di’ak.
Koordenadór EBF Tuana-Laran, Pedro Fonseca, relata katak eskola ne’e iha edifísiu rua de’it ho sala de aula neen, maibé sala sira ne’e la sufisiente atu akumula estudante 659, tanba ne’e eskola fahe alunu sira ba turma tolu atubele tuir prosesu aprendizajen ho di’ak.
“Ami iha limitasaun ho sala de aula, tanba ne’e ami fahe estudante 659 ne’e ba turma tolu. Dadeer hahú hosi 08h00 to’o 12h00 ba turma primeira, depois meudia 12h30 to’o 15h00 ba turma segunda no loraik15h30 to’o 17h30 ba turma terseira,” dehan Pedro Fonseca ba Tatoli, iha Tuana-Laran.
Hosi turma tolu ne’e, iha parte dadeer nian estudante hosi 4o no 5o anu maka tuir aula, depois iha meudia alunu hosi 2o no 3o anu no loraik 1o sira.
Nia esplika eskola foti medida ida ne’e atu labele abandona alunu sira iha prosesu aprendizajen tanba sira iha direitu atu asesu ba edukasaun, maske falta sala de aula. “Eskola labele impede labarik sira, entaun tau nafatin sira iha aula laran hodi hamenus de’it maka karga orária atu estudante hotu bele partisipa prosesu aprendizajen”, katak.
Eskola ne’e hato’o ona sira nia pedidu ba Diretora Eskola Sentru Faról, tanba EBF Tuana-Laran tama iha agrupamentu Faról nian atu hato’o hela pedidu ba Ministériu Edukasaun hodi aumenta sala de aula liuhosi prosesu konstrusaun ka reabilitasaun, nune’e fasilita estudante sira bele tuir dixiplina sira ho kompletu.
“Ita hein nafatin resposta atu hetan reabilitasaun ka konstrusaun foun iha ita-nian eskola”, koodenadór ne’e espera.
EBF ne’e iha profesór hamutuk 21 kompostu hosi permanente na’in-18 no kontratadu tolu, ne’ebé kumpre hela sira nia knaar hodi hanorin alunu hamutuk 659 – mane 386 no feto 273.
Jornalista: Tomé Amado
Editora: Maria Auxiliadora
Ita bele uza igreja 😉
Ita gasta osan barak liu atu harii igreja sira duke iha eskola sira.