Asidente tráfegu iha Vemasse rezulta karreta tolu estragu
BAUCAU, 25 abríl 2023 (TATOLI) – Komandu Polísia Nasionál Timor-Leste (PNTL), munisípiu Baucau, rejista kazu asidente tráfegu hamutuk rua iha postu administrativu Vemasse, rezulta karreta tolu hetan estragu grave no vítima na’in-16 hetan kanek kmaan.
Hosi akontesimentu rua refere, iha loron ne’ebé hanesan segunda, 24 abríl, asidente dahuluk akontese purvolta oras 07:50 dadeer iha aldeia Lor, suku Vemasse tasi, postu administrativu Vemasse mosu asidente singulár karreta ho marka Gerry xapa-matríkula A 27-192 TL.
Tuir kronolojia akontesimentu kondutór ho kondisaun dukur ne’ebé rezulta karreta baku-fila pasajeiru hamutuk na’in-hitu hetan kanek no transfere kedas ba Ospitál Referál Eduardo Ximenes (HorEX, sigla portugés) Baucau hodi kontinua halo tratamentu.
Enkuantu, asidente daruak akontese bainhira kareta rua xoke malu entre marka Carry xapa-matríkula A.27.818 ho Hilux xapa-matríkula 03.978 G purvolta oras 21:00 resin iha Vemasse.
“Ita konsege asegura no kontinua kedas evakua mai ospitál hodi kontinua halo tratamentu,” Komandante PNTL munisípiu Baucau, Superintendente Xefe, António de Sá hateten iha Vila Nova, tersa ne’e.
Asidente refere akontese bainhira karreta Carry hosi diresaun Baucau atu ba Dili no Hilux hosi Dili atu ba Baucau maibé to’o iha fatin akontesimentu hetan asidente ne’ebé rezulta karreta rua refere hetan estragu grave.
Hosi asidente refere rezulta vítima hamutuk na’in-sia komposta hosi pasajeiru hosi Carry na’in-lima no Hilux na’in-haat hetan kanek no kontinua evakua ba HorEX atu halo tratamentu.
“Kauza xoke maka’as tanba karreta rua nia parte oin rahun hotu ne’e katak kondús ho velosidade aas hodi rezulta asidente ne’e,” Superintendente Xefe António de Sá akresenta.
Tuir identifikasaun hosi PNTL Baucau katak, motivu dahuluk hosi akontesimentu rua refere deskonfia kondutór sira halai velosidade aas ho kondisaun dukur nune’e evidénsia sira sei iha fatin akontesimentu tanba kondisaun karreta la permite atu halo evakuasaun.
Hosi akontesimentu rua refere rezulta vítima hamutuk na’in-16 hetan kanek no laiha lakon vida nune’e parte PNTL Baucau rejista no sei kontinua halo prosesu investigasaun inklui identifikasaun vítima no suspeitu sira remata halo tratamentu iha ospitál.
Jornalista : Natalino Belo
Editór : Evaristo Soares Martins
