Ema ida lakon vida hafoin kampaña PUDD iha Baucau
BAUCAU, 25 abríl 2023 (TATOLI) – Vítima ho inisiál AM lakon vida hafoin tuir kampaña Partidu Unidade Dezenvolvimentu Demokrátiku (PUDD) iha munisípiu Baucau.
Kazu refere akontese iha loron-dumingu, 23 abríl, bainhira kampaña remata no militante sira evakua ba HoREX, tanba hetan asidente monu kanek grave.
“Ohin ita hetan novidade katak vítima lakon ona vida,” Komandante PNTL munisípiu Baucau, Superintendente Xefe, António de Sá Benevides, hateten iha Vila Nova, tersa ne’e.
Fatin akontesimentu besik armazein loja Palapa, suku Bahú, vítima haksoik hosi karreta leten tanba preokupa ho xapeu ne’ebé anin hú sai hosi ulun nune’e rezulta vítima tenke evakua ba Hspital Rejionál Eduardo Ximenes (HorEX) halo tratamentu.
Vítima ho inisiál AM mane (23), klosan hosi suku Abo, postu administrativu Quelicai, nu’udar militante partidu PUDD lakon vida iha loron-segunda, 24 fulan-baríl.
Iha momentu ne’e evakua ba halo tratamentu iha Hospital Nacional Guido Valadares (HNGV) tanba kondisaun grave iha ulun hafoin hetan pankada iha estrada.
Vítima hamutuk ho militante seluk utiliza karreta marka Carry ho xapa-matríkula B.12.346, fila hosi fatin kampaña kondús hosi motorista inisiál AB (41) estatutu kazadu ho velosidade normál maibé vítima AM hetan asidente tanba haksoik sai hosi karreta.
Antes ne’e, kampaña komísiu Partidu PUDD hala’o iha loron-dumingu, 23 abríl iha kampu Darsula, suku Gariuai, postu Baucau Vila ne’ebé mobiliza militante hosi postu admistrativu neen iha munisípiu Baucau.
Jornalista : Natalino Belo
Editór : Evaristo Soares Martins
