DILI, 25 abríl 2023 (TATOLI) – Ministériu Edukasaun Juventude no Desportu (MEJD) reabilita ona sala de aula hitu hodi fasilita prosesu aprendizajen ba alunu 1.062 iha Eskola Bázika Filiál (EBF) N.u 02 Bebonuk, maibé seidauk sufisiente ba estudante sira atu tuir prosesu aprendijazen.
Koordenadór EBF Bebonuk, Felisberto da Cruz, Ministériu Edukasaun finaliza ona reabilitasaun sala refere iha marsu liubá no dirijente eskola ne’e kontinua husu MEJD atu konstroi tan sala foun rua hodi kompleta sala sira ne’ebé maka MEJD prepara ona.
“Ita agora iha sala aula hitu ne’ebé Ministériu entrega ona mai eskola Bebonuk atu utiliza hodi hala’o prosesu ensinu aprendizajen ba estudante sira, maibé ita nafatin konsidera sala hitu ne’e mós seidauk sufisiente. Ita sei presiza tan sala foun rua iha eskola ne’e”, Felisberto da Cruz dehan ba Tatoli, iha Bebonuk.
Nia realsa se MEJD maka konstroi tan sala foun rua ba EBF Bebonuk, atividade ensinu aprendizajen ba alunu sira bele la’o tuir fali oráriu normál. “Maibé tanba sala la sufisiente atu akumula hotu estudante sira, entaun eskola deside aumenta turnu tolu ba estudante sira atu labele abandona sira”, katak.
Koordenadór eskola ne’e esplika katak ensinu aprendizajen ba estudante sira latuir ona oráriu normál, baibain kada eskola tenke iha de’it turnu rua, dadeer no meudia, maibé eskola Bebonuk utiliza turnu tolu, dadeer eskola hahú 08h00 to’o 10h00 ba estudante primeiru anu, 10h30 to’o 12h00 ba depois segunda anu no 12h00 to’o 15h00 ba sestu anu. Eskola ne’e iha profesór 24 – permanente 19, kontratadu haat no voluntária ida.
Ho preokupasaun ne’ebé maka dirijente sira iha eskola refere hato’o, hetan resposta hosi Diresaun Nasionál Dezenvolvimentu Parke Eskolár no konsidera katak asuntu ne’e pertinente tebes. “Maibé sira sei tau ba iha planu 2024 atu Governu foun mai maka sei realiza planu ne’e hodi konstroi tan sala rua ne’e”.
Reabilitasaun ba EBF Bebonuk ho andar ida ne’e ho sala aula hitu no hariis-fatin rua ne’ebé tama iha projetu komunitáriu. Reabilitasaun ne’e gasta osan hamutuk liu $88.273.
Jornalista: Tomé Amado
Editora: Maria Auxiliadora
